Россиядин виридалайни чIехи шуьмягърин багъ – ам СтIал Сулейманан райондин мулкунал ала – уьлкведин виридалайни зурба агалкьунрин арада аваз «Россия» форум-выставкадал майдандиз акъуднава.
Къенин йикъалди «Достижения.рф» сайтдин куьмекдалди и багъдиз выставкадал 776 касди сесер ганва. Къейд ийин, сесер гуна гьар садавай иштиракиз жезва.
Проект уьмуьрдиз кечирмишиз хьайи йисара «Полоса» ООО-ди ина 2200 гектардин чилел шуьмягърин багъ кутунва. Пешекарри гьисабзавайвал, ам Европада виридалайни екеди я. Майишатда шуьмягърин къелемар арадал гъизва, къелемлухди 40 гектардин чил кьунва. Планрик шуьмягърин багъдин майданар мадни гегьеншарун ква. Ина 50 агъзур тонн бегьер хуьз жедай гьамбарханаярни эцигдайвал я.
«Лезги газет»
