Малум тирвал, уьлкведин гзаф маса регионра хьиз, Дагъустан Республикадани мергьяматлувилин «Ватан хуьзвайбурун» фонд кардик ква. Ада «Вири Гъалибвал патал!» лишандик кваз халкьдиз дяведин махсус серенжемда кьиле США аваз НАТО-дин уьлквейри чпин къаюмвилик кутунвай Украинадин цIийи нацистрихъни фашистрихъ галаз къати женгера уьлкведин итижар хуьзвай чи рухвайриз, гьакI Донбассдин агьалийриз куьмекуниз эверзава.
И эверуниз жаваб гун яз, Ахцегь райондин кьил Абдул-Керим Палчаеван тапшуругъдалди райондин общественный палата СВО-дин иштиракчийриз куьмек гуз эгечIна. Райондин идарайрин коллективри, кьилди ксари чпин хушуналди са куьруь вахтунда мергьяматлувилин куьмекдин 3 тонндив агакьна савкьатар кIватIна. Тайиндиз лагьайтIа, 50 ящик ичер ва хъуьтIуьн шартIара чи аскерриз чарасуз герек шейэр: электрогенератор, устIарвилин алатар, алукIдай чими парталар, далдаламишдай (маскировочный) сеткаяр, къаткидай чими чувалар, недай суьрсет…
Талукь инсанрихъ галаз меслят хьайивал, кIватIнавай шейэр тухуз Махачкъаладай пар чIугвадай «Газель» автомашиндихъ галаз РД-дин Халкьдин Фронтдин векил Назиров Жамалутдин атанвай. Ада, Ахцегь районэгьлийриз рикIин сидкьидай сагърай лугьуналди къейдна хьи, вири савкьатар, Махачкъалада гьазурзавай махсус чIехи «Камаздиз» хъияна, Запорожьедин областдиз рекье твада. Абур ЦIийи йисан суваррин йикъара 36-бригададин 2-ротадин аскеррив агакьарда.
Мергьяматлувилин пар машиндиз яна рекье твазвай чкадал райондин общественный палатадин председатель Шемсидин Арухова ва координационный советдин председатель Али Исмаилова чпин рахунра ингье вуч лагьанатIа: «Фронтдиз куьмекунин мергьяматлувилин сувабдин кардик хушуналди чпин пай кутур вирибур сагърай. Гьелбетда, им фронтдавай чи аскерриз игьтияж ава лагьай чIал туш. Гьукуматди абур гьар са куьналди таъминарзава. Чи фикир абур миллетбазрихъ галаз чIугвазвай женгера мадни руьгьламишун, гъиле яракь аваз Ватан хуьзвай кьегьалар чи рикIел алайди, фикир, къайгъударвал ийизвайди къалурун я. Ватандин ЧIехи дяведин вахтунда хьиз, халкьни армия сад хьуналди чавай душмандин винел фад гъалибвал къачуз жеда».
Къейд ийиз кIанзава хьи, Ватандин итижар хуьзвай чи кьегьал рухвайрин гуьгьуьл къачун патал Ахцегь районэгьлийри «Аскердиз дидедин посылка» мергьяматлувилин серенжемдани активнидаказ иштиракзава. И жигьетдай район республикада кIвенкIвечийрин жергеда авайвиляй РФ-дин оборонадин министрдин патай райондин кьил Абдул-Керим Нажмудиновичан тIварцIел Чухсагъулдин чар атун лишанлу я.
Дашдемир Шерифалиев
