РД-дин юстициядин министерстводи республикадин муниципальный архиврин арада фотодокументрин виридалайни хъсан выставка хкягъун патал малумарай конкурсдин нетижаяр кьуна.
Конкурс РД-дин архиврин къуллугъдин 100 йисан юбилей къейд авунин сергьятра аваз кьиле тухванай. Адан макьсад фотодокументар туькIуьрунин кIвалах машгьур авун, республикадин жемият архивриз вахкудай документар гьазурунин кIвалахдал желб авун, гьакIни и хилен пешекаррин яратмишунрин жигьетдай бажарагъ винел акъудун, абур и кардал гьевесламишун тир. Конкурсда гъалиб хьайибуруз пишкешар гудай мярекат министерствода кьиле фена. РД-дин юстициядин министр Ханлар Пашабегова конкурсдин гъалибчийриз дипломар ва пишкешар гана.
Мегьарамдхуьруьн райондин администрациядин архивдин отделди конкурсда 3-чка кьуна. Диплом муниципалитетдин администрациядин архивдин отделдин везифаяр вахтуналди тамамарзавай Мадина Шагьмардановадив вахкана, хабар гузва райондин информациядин центради.
Амина Муслимова
