Мукьвара СтIал Сулейманан райондин Агъа СтIал-Къазмайрин мектебда мергьяматлувилин «Иман» фондуни райадминистрациядин куьмекдалди мектебрин 10-11-классра кIелзавайбурун арада урус чIалай районрин уртах II олимпиада кьиле тухвана.
Чирвилер ахтармишунин хъсан серенжемда СтIал Сулейманан, Мегьарамдхуьруьн, Докъузпара, Ахцегь, Кьурагь ва Хив районрин мектебрин 10-11-классра кIелзавай 79 ученикди иштиракна. Абурун чирвилериз тежрибалу пешекарри къимет гана: филологиядин илимрин кандидат, республикадин бажарагълу аялрин гзаф хилерин лицейдин директордин заместитель Х.Гьажимурадовади, бажарагълубур еримлу ийидай «Альтаир» центрадин муаллим И.Билаловади ва ДИРО-дин проектдин отделдин регьбер Р.Исабеговади.
Нетижада 11-классда кIелзавайбурун арада 1-чкадиз Амина Шихрагьимова (Курхуьруьн М.Рагьимован тIварцIихъ галай 1-нумрадин мектеб), 2-чкадиз Амирзан Шагьбазов (Кьулан СтIалрин Р.Халикьован тIварцIихъ галай мектеб) лайихлу хьана. 3-чка кьве касдиз гана: Зейнаб Салмановадизни (Гъепцегьрин мектеб) Аида Шагьмирзоевадиз (Агъа СтIал-Къазмайрин мектеб).
10-классда кIелзавайбурун арада 1-чка Рамиля Къанберовади (Филерин мектеб), кьвед ва пуд лагьай чкаяр Сумая Абдурагьимовадини (Цмуррин мектеб) Шамсият Шихрагьимовади (Кьулан СтIалрин Р.Халикьвован тIварцIихъ галай мектеб) кьуна. Тафаватлу хьайибуруз, абурун муаллимриз пулунин пишкешар, грамотаяр гана.
Чи мухбир
