2023-йисан январдилай сентябрдалди Дагъустанди къецепатан уьлквейриз маса ганвай суьрсетдин кьадар тахминан 40 процентдин гзаф хьанва. Йисан тамам делилралди, къецепатан уьлквейриз маса ганвай суьрсетдин кьадар 1,4 сеферда гзаф ва 190 миллион доллардиз барабар хьун гуьзлемишзава. Идакай республикадин журналистрихъ галаз хьайи гуьруьшдал РД-дин карчивилиз куьмек гунин центрадин регьбер Руслан Абаскъулиева хабар гана. Адан гафаралди, 2022-йисуз республикади къецепатаз 135 миллион доллардин къиметдин кьадарда аваз суьрсет ва къуллугъар маса гана.
Кьиле тухванвай кIвалахдин нетижайрикай рахадайла, Р.Абаскъулиева къейд авурвал, 2023-йисуз са шумуд бизнес-миссия тешкилна, яни суьрсет виридалайни хийирлудаказ маса гунин метлеб авай базарар тайинарна.
Ачухнавай цIийи рекьерикай рахадайла, Р.Абаскъулиева Омандиз ва Саудовский Аравиядиз мугьманвилер къейдна – ина Дагъустандай тир метягьдиз неинки еке итиж, гьакIни ам гъиле-гъил аваз маса къачуз гьазур тирди малумарна. Карчивилин итиж аваз республикадиз 2023-йисуз гьакIни Узбекистандай, Белоруссиядай, Къазахстандай ва Ирандай делегацияр атана.
«Идалайни гъейри, чи са жерге карчийриз чпин метягь международный выставкайра къалурдай мумкинвални хьана. Абурун жергедай яз чукIулар гьазурзавай «ПП Къизляр» ООО-дин тIвар кьаз жеда – ада вичин суьрсет Къазахстанда майдандиз акъудна», — лагьана Абаскъулиева.
Дагъустанда гьазурзавай шейэр къецепатан уьлквейриз маса гунин месэладикай рахадайла, къейд авурвал, и кар кьилиз акъудун патал центради еке кIвалах тухузва: базар ахтармишзава, муьштерийрин итижар фикирда кьазва, метягь анриз тухудай рекьер-къайдаяр туькIуьрзава.
Малум хьайивал, къецепатан уьлквейри иллаки еке итиж Дагъустандин агропромышленный комплексдин суьрсетдиз ийизва – як, балугъ, бязи майваяр, гьакIни консервияр, мижеяр, ширинлухар муьштерийри рикI алаз маса къачузва.
Амина Муслимова
