Мукьвара зун къуншидин теклифдалди жуван хайи хуьруькай – Докъузпара райондин Къурушрикай — гьазурнавай передачадиз килигна. Сифте нубатда заз и передача гьазурун патал зегьмет чIугур журналистриз сагърай лугьуз кIанзава. Чи хуьрерикай ихьтин передачаяр гьикьван гзаф хьайитIа, гьакьван абурун машгьурвилин сергьятарни гегьенш жеда.
Передачада са шумуд касди хуьруькай гьар жуьредин малуматар ганва. Виридал зун акъваздач, амма гьакъикъатдихъ галаз кьан тийизвай са делил туькIуьр хъувун герек я. Кьилди къачуртIа, ана Рамазан Къулиева Шалбуз дагъдин ценерив гвай Куркур булахдин яд, еке зегьметар чIугуна, хуьруьз гуя вичи гъайиди я лугьуз тестикьарзава. Авайвал лагьанайтIа, хъсан жедай…
Куркур булахдин яд хуьруьз гъунин теклиф гайиди рагьметлу Аладин Алимов, и кIвалах кьилиз акъудун патал герек проектар, сметадин документар гьазурайди а чIавуз хуьруьн администрациядин кьилин везифаяр тамамарай Вакъиф Баширов тир. А йисара Махачкъалада чи баркаллу хуьруьнви Гьасен Балатова кIвалахзавай. Ам Докъузпара райондин патай республикадин Халкьдин Собранидин депутат тир. Вакъиф Баширов винидихъ къейднавай месэла гьялун патал, куьмек герек яз, са шумуд сеферда адан патав фенай. И кьве касдин алахъунар себеб яз, Куркур булахдин ядни Къурушрин хуьруьв агакьна.
Са сеферда чун хуьруьн кимел ацукьнавайла, вичи гайи теклиф кьилиз акъудунай хейлин инсанар алай чкадал рагьметлу Аладин халуди Вакъиф Башироваз сагърай лагьанай. Хайи чилихъ рикI кузвай, ам авадан хьун патал зегьмет чIугвазвай кьегьалар вири хуьрера ава. Абурун лайихлувилер рикIелай алудна виже къведач.
Шихали Багъиров,
Вини Къуруш
Редакциядин патай
Гьакъикъатдани, Шалбуз дагъдин ценерив гвай са чешмедай Къурушрин хуьруьз 4 километрдин мензилдиз цин турбаяр тухун патал вичивай хуьруьнвийри куьмек тIалабайдакай рагьметлу Гьасен Балатова алатай йисуз, адан 85 йисан юбилейдихъ галаз алакъалу яз, «Лезги газетда» чап авур «Халкьди гьуьрметзавай хва» макъалада ихтилатнай. Хуьруьнвийрин тIалабун кьилиз акъудун патал Гьасен Балатов а вахтунда республикадиз регьбервал гузвай Мегьамедали Мегьамедован патав фенай. Са шумуд сеферда кьиле фейи рахунрилай кьулухъ эхирни къурушвийрив дагъдин чешмедин яд агакьнай.
