СтIал Сулейманан районда эцигунрин «Хатасуз еридин рекьер», «Рекьерин майишат вилик­ тухун», «Чкадин сифте кьил куту­нар» программайрайни­ про­ект­рай федеральный, рес­пуб­ли­ка­­­дин ва чкадин метлеб авай рекьер вижевайдаказ ремонт хъийизва.

Райондин мулкунилай фенвай республикадин метлеб авай асул рекьерикай сад «Мамрач-Таш­ка­пур-Аракандин муьгъ» автомашин­рин рехъ я. И рекьин километр­дал кьван 15 участокди, кьилди къачуртIа, санлай 100 агъзурдалай виниз инсанар яшамиш жезвай СтIал Сулейманан, Хив, Агъул­ ва Кьурагь районар федеральный М-29 «Кавказ» шегьредихъ галаз алакъалу ийизва. СтIал Сулейманан райондин мулкунилай фенвай 15 км рекьин участок лап чIуру гьалдиз атанвай, ана капитальный ремонтрин кIвалахар кьиле тухун тавуна 25 йисалай виниз тир.

Арадал атанвай чIуру гьалар­ фикирда кьуна, 2022-йисуз «Мам­рач-Ташкапур-Аракандин муьгъ» ре­­кьин 10 километрдал кьван учас­ток бинедилай ремонт хъувунай­. 2023-йисуз капитальный ремонт­рин кIвалахар и рекьин 10-15 км учас­токда кьиле тухвана. Ана цIийиз къир цунихъ галаз сад хьиз, яд къерехдиз акъуддай къурулуш ремонтна, са кьадар мензилда рекьин кьве патайни ракьун жугъунар туькIуьрна, тротуарар, 10 чкадал инсанар улакь гуьзлемишиз акъваздай кьурар эцигна, рекьин къерехра лишанар цIийи хъувуна, 6370 метрда экв гудай лампаяр алай 208 даях акIурна ва маса кIвалахар тамамарна.

И йикъара «Мамрач-Таш­ка­пур-Аракандин муьгъ» рекьин 10-15 километрдин участок ачухуниз талукьарнавай шадвилин мярекат кьиле фена. Агъа СтIал-Къазмайрин юкьван школадин къаншарда кьиле фейи мярекатда СтIал Сулейманан райондин кьил Саид Темирханова, адан заместитель Лацис Оружева, «Дагавтодор» ГКУ-дин директордин заместителар тир Сагьид­агьмед Ибрагьимова, Замир Умаханова, 3-ДСУ-дин кьил Муталиб Эмсетова, РД-дин транспортдин министерстводин векилри, жавабдар маса ксари иштиракна.

Саид Темирханова «Дагавто­дор» ГКУ-дин кьилин пешекар­рихъ галаз санал цIийикIа туькIуьр хъувунвай рекьин участок ачухунин шартIунин яру лент атIана. Идалай гуьгъуьниз шадвилин митинг кьиле фена. Анал тебрикдин сифте гаф рахай Саид Темирханова районда госпрограммайрай ва милли проектрай капитальнидаказ ремонт хъувунвай­ ва дуьз­мишнавай рекьерикай, и жигьетдай къведай йисуз кьиле­ тухун патал пландик кутунвай кIва­лахрикай гегьеншдиз суьгьбетна.

— ЦIинин йисуз районда «Мам­­­рач-Ташкапур-Аракандин муьгъ»  ре­кьин къе ачухзавай учас­токда, «Курхуьр-КIварчагъ-Сиртыч» ре­кьин­ 3-12-километр­дин учас­ток­да би­недилай ремонтрин кIва­­ла­хар кьиле тухвана акьал­тIар­на, — лагьа­на С.Темирханова. – Ибур лап важиб­лу месэлаяр я. Ихьтин мумкинвал­ гунай, къайгъударвал авунай ва тамама­рай кIвалахрай райондин руководстводи, вири агьа­лийри рес­публикадин Кьил Сергей Мелико­ваз, РД-дин­ гьуку­матдиз, тран­с­портдин ми­нис­тер­ст­водиз, кIва­лах­рин заказчик­ тир «Даг­автодор» ГКУ-диз, пудратдин­ «Дагспец­с­т­ройсервис» ва «Дорож­но­-строи­тельное управление №3» ООО-риз рикIин сидкьидай чухса­гъул лу­гьузва. Къуй цIийи хъувунвай рекьер хийирдин рекье ишлемишдайбур хьурай!

«Дагавтодор» ГКУ-дин директордин заместитель Сагьидагьмед­ Ибрагьимова тебрикдин келимаяр лугьунихъ галаз санал къейдна хьи, рекьин и участокда бинедилай ремонтрин кIвалахар РД-дин транспортдин министерстводин такьатрин гьисабдай кьилиз акъудна. Санлай участокда цIийиз къир цун хъувур майдан 40 агъзур кв. метрдиз барабар я. Икьрардин  къимет 346 миллион манат я.

Мярекатдал тебрикдин келимаяр Агъа СтIалрин хуьруьн администрациядин кьил Надир Эфендиева, Агъа СтIал-Къазмайрин юкьван школадин директор Жаб­раил Асланова ва масабуру лагьана.

Хазран  Кьасумов