Гьар гьихьтин хьайитIани хъсан тежриба, метлеблу серенжем адетдиндаз элкъуьруьн бегьерлу ва чарасуз кар я. Ихьтин фикир Дагъустандин регьберди­ цIи кьвед лагьай сеферда кьиле тухвай­ ачух эфирдикайни лугьуз жеда.

И се­ренжемди мад сеферда успатна хьи, Сер­гей Меликов республикадин агьалийрин месэлайрихъ ачухдаказ, арачиярни керкичияр арада авачиз яб акализ­ гьазур я. Санлай республикадин пата­­хъай еке жавабдарвал хиве авайди гьисс авуналди, ада вич гьар са агьали­дин мидадда акьаз гьазур регьбер яз къалурзава. Сир туш, регьбердив агакь тийизвай, адав агакьариз тежезвай хейлин тIал алай месэлаяр ачух эфирдин ужунда винел акъатзава. Тайин агьалиди гайи тайин суал неинки гьада къарагъарай месэла гьялуналди, гьакI гьадаз тешпигь хейлин маса месэлаярни гьялунал муниципалитетрин кьилерин фикир желбзава.

Агьалийри газдихъ, образованидихъ, жемиятдин улакьрихъ, ЖКХ-дихъ, мулкар абадунихъ, здравоохраненидихъ, рекьерихъ, энергетикадихъ  ва маса хилерихъ галаз алакъалу месэлаяр гзафни-гзаф къарагъарна. Меркезвийри шегьердин са кьиляй муькуь кьилиз жемиятдин улакьра аваз финиф четин хьанвайдакай, улакьар бес тежезвайдакай малумарна. Агьалияр шегьердин къене санай масаниз тухудай, гьакI Каспийскдай Махачкъаладиз фидай мумкинвилер, улакьрин кьадарар фикирдиз къачуртIа, Кас­пийскдани, Дербентдани и гьалар Махачкъаладилай бешбетер я. Каспийскдай Махачкъаладиз фин патал остановкайрал улакь вилив хуьзвай агьалияр тилит­риз элкъвезва.

Ачух эфирдин вахтунда малум хьайи­вал, хсусиятчийри агьалияр санай маса­низ тухунин крар ерисуздаказ кьилиз­ акъуд­­зава. Гьакъисагъсузвилелди кIва­лах­­­завай хсуси тешкилатрихъ галаз ала­къалу месэла къведай йисуз гьялун хиве кьуна.

Гзаф суалар гьасятда тайин жавабар гуз тежедайбур тирвиляй С.Меликова хейлин месэлайрай вичел чарар агакьа­рун тIалабна. Гьа са вахтунда къарагъарзавай месэлаяр гьялиз хьунин ва я тахьунин патахъай талукь тир минис­терствойри, идарайри, тешкилатри, муниципалитетрин кьилери атIай жавабар­ гун чарасуз жезва. Гьавиляй Рес­пуб­ликадин Кьили вири муниципалитетрин кьилериз чкайрал агьалийрин иштираквал авай ачух эфирар кьиле тухун тек­лифна.

Малум жезвайвал, ачух эфирда къарагъарзавай хейлин месэлаяр регьятдиз­ гьялиз жезвайбур тирвиляй агьалийрин­ дердияр сад-кьве йикъан къене туь­кIуьзва.

Лугьуз жеда хьи, лап хци месэлаяр гьялиз хьуник умуд кутазвай дагъустанвияр патал ачух эфир умудрин эфирдиз элкъвезва.

К.Ферзалиев