И йикъара Кьасумхуьрел Росгвардиядин оперативный метлеб авай 102-кьилдин бригададин Военный оркестр ва Т.Мурадован тIварунихъ галай Дагъустандин госфилармония­дин манидарар мугьман хьана. Абуру «За ислягьвал хкязава» серенжемдин сергьятра аваз концертдин чIехи прог­рамма къалурна.

«РД-дин терроризмдиз акси комплексный программадин» бинедаллаз терроризмдиз ва экстремизмдиз акси кIвалах тухунин сергьятра аваз и серенжем Дагъустан Республикадин культурадин министерстводи ва Даггосфилармонияди тешкилнавайди тир.

Дагъустандин культурадин министерстводи, махсус серенжемдин тереф хуьн яз, 2023-йисуз культурадинни марифатдин са жерге мярекатар кьиле тухузва. Кьасумхуьрел Росгвардиядин Военный оркестр атунни абурукай сад я.

Концертдин программа башламишдалди вилик сегьнедиз райондин адми­нистрациядин кьилин 1-заместитель­ Лацис Оружев экъечIна. Ада «За ислягьвал­ хкязава» серенжемдин сергьятра аваз, ихьтин важиблу мярекат­ тешкилу­най рес­­­публикадин культура­дин минис­тер­ст­во­диз­, Росгвардиядин ва Даггосфилармо­ниядин кьиле авай ксариз, Во­енный оркестрдиз СтIал Су­лейманан­ райондин кьил Саид Темирханован тIва­рунихъай чух­сагъул лагьана. Военный оркестрдин начальник ва дирижёр, РД-дин лайихлу артист, капитан Ильяс Бектемирова чеб хушвилелди кьабулунай райондин кьиле авай ксариз, вири агьалийриз чими гафар лагьана. Ада Рос­гвардияди тухвай кьве конкурсдин гъалибчи тир вичи регьбервал гузвай оркестрдикай куьруь суьгьбет авуна.

Концертдин чIехи программа Военный оркестрдин манидар, РД-дин лайихлу артист Денис Федоренкоди ва операдинни балетдин театрдин манидар Эльвира Маммадаевади машгьур «Смуг­лянка» мани тамамарунилай башламишна. Абуру санал ва кьилди-кьилди тамамарзавай манияр концертдин программадик гзаф квай.

Ильяс Бектемирова устаддаказ кьиле тухвай концертдин программадик РД-дин лайихлу артистка, Даггосфилармо­ниядин манидар Адиля Хаметовади, «Дербент» ансамблдин манидар Ислам Велиханова­, СтIал Сулейманан райондин аялрин ярат­мишунрин кIвалин вокалдин «Куьре»­ ансамблди тамамарай­ ватанпересвилин манияр, Военный ор­кестр­дин коллективди, кьилди адан манидар, РД-дин лайихлу артист Агьмед Байрамова кларнетдай тамамарай макьамар, оркестрдин артистри «Лезгинка» макьамдал авур кьуьлер ва ма­са нумраяр (зал сиве-сивди ацIанвай) та­машачийри гурлу капар ягъу­налди ва цуьк­верин кIунчIар гуналди къаршиламишна.

Концертдин программадилай гуьгъуьниз Ильяс Бектемирова са шумуд касдив Дагъустандин культурадин министр Зарема Бутаевадин къулар алай гьуьрметдин грамотаяр, чухсагъулдин­ ча­рар ва дипломар вахкана. Кьилди къа­чуртIа, «За ислягьвал хкязава» серенжемда активвилелди иштиракунай министерстводин ша­багьриз райондин кьил Саид Темирха­нов, адан 1-замес­ти­­тель Лацис Оружев, общественный хатасузвал хуьнин рекьяй райадминистрациядин кьилин заместитель Абута­либ Фату­лаев, райондин образованидин управленидин начальник Гьуьсейн Шихбабаев, культурадин управленидин начальник Майрудин Бабаханов, РУО-дин патав гвай ИМЦ-дин директордин замес­титель Венера Абдуселимова, вокалдин «Куьре» ансамблдин регьбер Нариман Османов, «Дербент» ансамбл­дин манидар Ислам Велиханов, райондин аялрин яратмишунрин кIвалин тербиячияр — жаван манидарар Жамал Агъабегов, Золина ва Айша Османоваяр, Ханум Агъа­мирзоева, Насир Мегьамедов лайихлу хьана.

Хазран  Кьасумов