Духтуррин гъалатlар тайинарда

Россияда духтуррин гъалатl­рик акатзавай тахсиркарвилер тайинарзава. Идан гьакъиндай уьл­кведин Силисдин  комитетдин сайтда ма­лумарнава.

Медицинадин куьмек чIурукIа гуниз ва, ихьтин куьмек гудайла, далдаламишай тахсиркарвилериз талукь яз уголовный кодексдик цlийи статьяяр кухтун теклифзава. Къейдзавайвал, алай вахтунда духтуррин гъалатlар, абурун пешекарвилин кьетlенвилер фикирда кьун тавуна, УК-дин жуьреба-жуьре статьяйрай тайинарзава.

Силисдин комитетди къейдзавайвал, исятда кардик квай РФ-дин УК-дин къайдайрилай тафаватлу яз, теклифзавай дегишвилер медицинадин къуллугъчидиз, ада гузвай куьмекдин жуьредиз талукь жеда. Идалайни гъейри, медицинадин къуллугъ авурдалай кьулухъ гьихьтин нетижаяр жедатlа, гьабурни фикирда кьада. Теклифзавай дегишвилер кардик кутун патал махсус рабочий десте арадал гъанва, иник Милли медицинадин палатадин къуллугъчиярни ква.

Къейд ийин, духтуррин гъалатlар Россияда 2018-йисан сифте кьиле гегьеншдиз веревирдна. И йисан январдиз гематолог Елена Мисю­ри­надик­ гъалатlдиз рехъ гунай тахсир кутунай ва ам 2 йисан муддатда дустагънай­.

Дуст жез кlанзава

США-дин президент Д.Трампан фикирдалди, гележегда вири уьлквеяр Россиядихъ галаз рекье фида ва хъсан алакъаярни жеда. Reuters чешмеди хабар гузвайвал, идан гьакъиндай Америкадин регьберди Брюсселда НАТО-дин саммитдин нетижайриз талукь пресс-конференциядал малумарна.

“Россиядихъ галаз меслят хьуник за умуд кутазва”, — лагьана Трам­п­а­­.

Ада ихтилатзавайвал, НАТО гзаф къуватлу союзник я. Ада Россия­дин Президент В.Путин Европа ва я США патал къурхулувал яз акуна кlанзавачирдакай лагьана. Гьа и месэла патал Кеферпатан Атлантический альянс герек я.

Трампа мадни къейд авурвал, алай вахтунда Путин адан дуст хьун мумкин туш, гьикl хьи, абуруз садаз-сад акьван хъсандиз чизвач. Ада мад сеферда къейдна хьи, Россиядин Президент вичин душман ваъ, акъажзавай кас (соперник) я. “Са мус ятlани мумкин я ам зи дуст же­да”, — лагьана Трампа.

НАТО гегьеншарда

Гуржистан НАТО-дик акатда. Идан гьакъиндай альянсдин генеральный секретарь Йенс Столтенберга малумарна.

“Куьн ихтибар ийиз жедай асул дустарикай сад я. Гуржистан НАТО-дин член жеда. Гьукуматрин регьберри-членри и кар тестикьарнава”, — лагьана ада.

Майдиз Гуржистандин премьер-министр Георгий Квирикаш­вилиди малумарнай хьи, уьлкве НАТО-дик экечlда. Идалай вилик уьлкведин президент Г.Маргвелашвилиди лагьанай хьи, уьлкведи “кlвалин кlва­лахдин” вири пунктар тамамарнава, гьа жергедай яз герек тир цlийи­вилерни туна, тешкилатдиз гьахьун патал НАТО-ди ­виликамаз малумарай жуьреба-жуьре истемишунарни кьилиз ­акъудна.

Алимри теклифзава

Алимри пи алуддай ва тlуьр затlар иливарун хъсанардай вад продуктдин тlварар кьунва. РЕН ТВ телеканалдин сайтди кхьизвайвал, артухан заланвал авай, куьк инсанри сифте нубатда артишок ишлемишна кlанда. Адак менфятлу затlар ква.

Алимри теклифзавай кьвед лагьай продукт грейпфрут я. Вичик тlи­мил калорий квай и емишди гзаф тlуьнин вилик пад атlуда ва иви­дик­ квай шекер къайдадик кутада. Жакlумрин заланвал артухарун­ патал не­кlедин мукашди куьмекда. Къацу чайдин куьмекдалди лекь сагъариз­ жеда. Ивидин дамарар михьун патал ва беденда иви къе­къуьнин тегьер хъсанарун патал кайенский истивутдикай менфят къачуз жеда.

Путина ихтилатна

Футболдай дуьньядин чемпионат кьиле фейи вахтунда Рос­сиядин­ махсус къуллугъри саки 25 миллион кибергьужум дуьздал акъуд­на. Кремлдин сайтди малумарзавайвал, идан гьакъиндай Россиядин Президент В.Путина ихтилатна.

“Дуьньядин чемпионат кьиле фейи вахтунда саки 25 миллион кибергьужум ва футболдай дуьньядин чемпионат кьиле тухунихъ галаз алакъалу тир уьлкведин информациядиз таъсирдай маса жуьредин тахсиркарвилер арадай акъудна”, — лагьана уьлкведин регьберди.

Путина суьгьбет авурвал, чемпионатдин вахтунда гьич са чlуру агьвалатдизни рехъ ганач. Махсус къуллугърин ва къайдаяр хуьдай органрин кlвалах себеб яз, къецепатан уьлквейрай атай мугьманри чеб хатасуз тирди гьиссна. “Хатасузвилихъ галаз алакъалу вири месэлаяр мягькемарнавай, гьа са вахтунда герек авачир къулайсузвилерни арадал гъанач”, — лагьана Путина.

Ада алава хъувурвал, дуьньядин чемпионатдин вахтунда ха­тасузвал  таъминарун  патал  34  гьукуматдин  55  махсус  къуллугърин ва къайдаяр хуьдай органрин 126 векил желбна. Путинан гафа­рал­ди, сада-садаз ихтибар авун, тежриба чирун, органри ва махсус къуллугъри санал кlвалахун — ибур къенин юкъуз иллаки важиблу крар я.

Къейд ийин, Россияда 14-июндиз башламишай футболдин дуьнья­дин чемпионат 15-июлдиз акьалтlна. Финалда Франциядинни Хорватиядин хкягъай дестеяр къугъвана ва 4:2 гьисабдалди Франциядин командади гъалибвал къачуна.

Гьазурайди — Куругъли Ферзалиев