Гьафтеда кьве сеферда
Зулунни хъуьтIуьн муддатда «Buta Airways» авиакомпанияди гьафтеда кьве сеферда, ислен ва жуьмя йикъара, «Airbus A320» самолетра аваз Махачкъаладай Бакудиз арада акъваздай чка авачир рейсер кьилиз акъудда. Идакай меркездин аэропортдин пресс-къуллугъди хабар гузва.
Самолетди Махачкъаладин аэропортдай Москвадин вахтуналди йифен сятдин 12 жез 5 декьикьа амаз (23:55 мск) лув гуда ва ам Азербайджандин меркездив чкадин вахтуналди йифен сятдин 2-даз (02:00) агакьда. (Къейд ийин хьи, Махачкаладинни Бакудин вахтарин арада 1 сятдин тафават ава).
Бакудай самолет чкадин вахтуналди йифен сятдин 11 жез 15 декьикьа амаз (22:45) экъечIда, Махачкъаладин аэропортдив ам Москвадин вахтуналди йифен сятдин 11-даз (23:00) агакьда. Рекье 1 сятни 15 декьикьа жезва.
КIвалах акьалтIарун патал
РЖД-ди (Россиядин ракьун рекьер) Махачкъаладин гьуьлуьн алишверишдин портуна ракьун рекьин чара ийидай (сортировочный) парк эцигна акьалтIарун пландик кутунва. Идакай «Дагъустандин экономика» телеграм-каналди хабар гузва.
Чешмеди къейдзавайвал, и проектдиз ачухзавай инвестицийрин кьадар 1 миллиард манат яз гьисаба кьунва.
Идалайни алава яз, портунин векилди къейд авурвал, РЖД-ди карханадал кьван ракьун рекьин хел тухунни пландик кутунва.
Мергьяматлувилин центр
Дербентда и йикъара мергьяматлувилин «Лацу къизилгуьл» тIвар алай центр ачухна. Идакай «Дербентдин хабарар» изданиди кхьизва.
Хабар гузвайвал, алай вахтунда, санлай къачурла, уьлкведа ихьтин 20-далай виниз центраяр кардик ква.
Мергьяматлувилин центрадин кьилин макьсад пулсудаказ дишегьлийрин репродуктивный къурулушдин онкологиядин начагъвилер комплекснидаказ диагностика авун, дишегьлийрин фикир чпин сагъламвилел, вахт-вахутнда чпи-чеб ахтармишунал желб авун я.
Чешмеди кхьизвайвал, «Лацу къизилгуьл» тIвар алай центр алай девирдин тадаракралди таъминарнва.
Центр Дербент шегьердин Дрожжинан куьчеда авай 66 «А» нумрадин дараматда ава.
Гьазурайди — Муса Агьмедов
