Малум тирвал, Украинада кьиле тухузвай дяведин махсус серенжемда уьлкведин гьар са пипIяй хьиз, СтIал Сулейманан райондайни цIудралди жегьилри иштиракзава. Абурукай сад Испикрин хуьряй тир Марсель Ризаев я. Отпускдиз хтай ватанперес хва райадминистрациядин кьилин жемиятдин хатасузвал хуьнин рекьяй заместитель Абуталиб Фатулаева кьабулна. Гуьруьшда Марселан буба, райондин «афгъанви» ветеранрин Советдин председатель Ислеман Мевлидиновичани иштиракна.
А.Фатулаева лагьайвал, алай вахтунда СВО-да райондай 400 касди иштиракзава. Абурук контрактникар, мобилизация авунвайбур ва гуьгьуьллубур акатзава. Махсус серенжемда иштиракзавай гзаф жегьилар гьукуматдин шабагьриз лайихлу хьанва. Гьайиф хьи, къурбандар авачиз туш, са шумуд кас женгера игитвилелди телеф хьана. Абуруз «Жуьрэтлувиляй» орденар ганва.
— Чи кьегьал хва Марсель Ризаеваз баркалла ва аферин! — лагьана Абуталиб Фатулаева. — Журналист, муаллим ва шаир тир ам алай вахтунда политикадинни тербиядин рекьяй ротадин командирдин заместитель я. Ахьтин ватанперес рухвайрал чна гьахълудаказ дамахзава.
Гуьруьшдилай гуьгъуьниз чазни Марсель Ризаеваз са шумуд суал гудай мумкинвал хьана.
– Испикрин школада муаллимвиле, Кьасумхуьруьн «Эксклюзив» телевиденидин корреспондентвиле кIвалахай вун СВО-диз гьикI акъатайди я?
— Махсус серенжем башламишайла, за Москвада кIвалахзавай. Россиядин хатасузвал къурхулувилик акатай макъамда зунни гуьгьуьллувилелди Ватан хуьзвайбурун жергедик экечIна. Заз гьакI тербия ганва. Зи буба Афгъанистандин дяведин гьерекатрин ветеран, инвалид я. Зи кьве чIехи бубади Ватандин ЧIехи дяведа чанар гана. Чун чи бубайрин чешнедалди чIехи хьана. Къе за мотострелковый ротада итимвилин буржи тамамарзава. Россиядин армияда адетдин жегьилрикай халис женгчияр, кар чидай пешекарар, ватанпересар гьазурзава.
– Вахъ лезги халкьдин векилар галани?
— За алай вахтунда Западный военный округда, Луганскдин областда къуллугъзава. Дуьз лагьайтIа, дагъустанвияр тIимил ава. Амма абуру чеб халис ватанпересар, дагъвияр яз къалурзава. Женгинин гьерекатрив вири вердиш хьанва, я кичIевал, я четинвал авач. Чкайрилай школайра кIелзавай аялри кхьизвай кагъазри чи гьевес хкажзава. Минометрайни танкарай цIай гузвай макъамда ихьтин кагъазри гьар са аскердиз къуват гузва, абуру далудихъ къадирлу халкь, багърияр, мукьва-кьилияр галайди гьиссзава.
Эгер жегьилдиз армиядин жергейра акъвазиз ва я СВО-да иштиракиз кIан хьайитIа, адавай контракт кутIуниз жеда. Имни гьар са касдин хушунин кар я…
— Чи кар гьахълуди я, чун гъалибни жеда! — хълагьна эхирдай Марсель Ризаева.
Хазран Кьасумов
