Нетижаяр кьуна
Махачкъаладин гьуьлуьн алишверишдин портуна 2023-йисан январь-сентябрь варцара ичIирай парцин кьадар 2 миллионни 203 агъзур тонндив агакьнава. Алатай йисан и муддатдив гекъигайла, и рекъем 9,4 процентдин артух хьанва. Идакай «Дагъустандин экономика» телеграм-каналди хабар гузва.
Чешмеди къейдзавайвал, 2022-йисан сифтегьан 9 вацра портуна ичIирай парцин кьадар 2 миллионни 12 агъзур тонндиз барабар тир.
Къейд ийин хьи, портунив агакьзавай парцин чIехи пай нафтIадал ва нафтIадин продуктрал, техилдин магьсулрал, цементдал, минеральный миянардай затIарал, балугъчивилин продукциядал ацалтзава.
Чешмеди гьакIни хабар гузвайвал, Дагъустандин меркездин портуни 10 йисан къене сифте яз импортдин улакьар авай гими кьабулна. Къейдзавайвал, гьуьлуьн улакь Ирандай атана.
Гуж акьалтнавайбур дегишда
Дагъустанда газдалди таъминардай гуж акьалтнавай са шумуд объектдал алай махсус тадаракар цIийи хъийида. Идакай «Дагъустандин экономика» телеграм-каналди хабар гузва.
Мисал яз, газдалди таъминардай кIвалахдин ери хъсанарунин макьсаддалди Дербент ва Докъузпара районра 1-декабрдалди «Моздок — Къазимегьамед» магистралдин газопроводдилай ГРС «Белиджи» объектдал кьван вахтуналди тир турба эцигунин кIвалахар акьалтIарун пландик кутунва. Чешмеди къейдзавайвал, и серенжем кьиле тухуникди, газдин давление саки пуд сеферда артух жеда.
«Газпром трансгаз Махачкала» компаниядин генеральный директор Александр Астанинан гафаралди, гьакIни зулунни хъуьтIуьн муддат алукьдалди, 228 километрдин мензилда авай турбаяр (тадаракар) ахтармишунин нетижада винел акъатай нукьсанар туькIуьр хъувунва.
Алатай йисан дережада
Дагъустанда 2023-йисуз гьялнавай сарин кьадар алатай йисан дережада ама: алай йисуз и рекъем 14 агъзур тонндиз барабар хьанва. Идакай РД-дин хуьруьн майишатдин ва недай суьрсетдин министерстводин пресс-къуллугъди хабар гузва.
Ведомстводин делилралди, республикади 1 агъзур тонндив агакьна сар къецепатан уьлквейриз ракъурнава.
Виридалайни кьуьзуьбур
Дагъустандин Яшайишдин фондуни республикада яшамиш жезвай яшлу ксарин кьадар тайинарнава. ИкI, алай вахтунда регионда чпин яшар 100 ва адалай гзаф тир 101 кас яшамиш жезва. Абурукай 91 кас — дишегьлияр ва 10 итимар я, — хабар гузва «Дагъустан» РИА-ди.
Чешмедин малуматралди, Дагъустанда виридалайни яшлу дишегьли 1910-йисуз дидедиз хьанва, алай вахтунда 113 йис тамам хьанвай ам Махачкъалада яшамиш жезва. Виридалайни яшлу итим лагьайтIа, Хасавюрт райондин Аксай хуьряй я, 1915-йисуз дидедиз хьайи адан алай вахтунда 108 йис я.
Яшайишдин фондунин пресс-къуллугъди къейдзавайвал, республикада гзаф яшар хьанвай агьалийрин умуми гьисабдикай чIехи пай дишегьлияр я.
15 йисан къене сифте яз
Мукьвара Махачкъалада — Сепараторный микрорайонда ва Ленинкент поселокда — эхиримжи 15 йисан къене сифте яз цIийи духтурханаяр ачухда.
Къейдзавайвал, медицинадин идараяр 2021 ва 2022-йисара эцигиз башламишна. Алай вахтунда и объектар коммунальный къурулушрик кутуниз ва дараматрин мулкар авадан авуниз талукь кIвалахар кьиле тухузва.
Гьа икI, мукьва девирда 50 агъзурдалай виниз агьалияр яшамиш жезвай Сепараторный микрорайонда ва 30 агъзурдалай виниз агьалияр авай Ленинкент поселокда са сменада 250 кас кьабулиз жедай духтурханаяр кардик акатда.
Чешмеди гьакIни хабар гузвайвал, медицинадин и кьве дараматни здравоохраненидиз талукь махсус программайрин сергьятра аваз эцигнава.
Гьазурайди — Муса Агьмедов
