13-ноябрдиз Дагъустандин Кьил Сергей Меликов Украинада кьиле тухузвай дяведин махсус серенжемда аскервилин буржи кьилиз акъуддайла телеф хьайи дагъустанвийрин хизанрин векилрихъ галаз гуьруьшмиш хьана.
«Зун гьар са хизандин месэлайриз фикир гуз гьазур я. Им зун патал алава кIвалах туш, офицердин намусдин кар ва куь вилик зи буржи я», — къейдна Сергей Меликова гуьруьшдин сифте кьиляй. КIватI хьанвайбур Ватан патал чпин чанар къурбанд авурбурун гьуьрметдай са декьикьада кисна акъвазна.
«Чна къе чи уьлкведин халис ватанпересар рикIел хкизва. Абур Дагъустандин лайихлувал, намус къалурзавай халис кавказвияр я. Уьмуьрдай фенвайбурни, уьлкведин аслу туширвал патал женг чIугвазвайбурни чпелай чешне къачуниз лайихлу инсанар я. Махсус серенжемдив эгечIай йикъалай чпин вилик эцигнавай везифаяр гьакъисагъвилелди, чешнелувилелди тамамарзавай викIегьбуру масабурни гъалибвилихъ тухузва. Серенжемда телеф хьайи вири кьегьалар Игитар я. Чна абурун Игитвилел дамахзава», — лугьуналди Дагъустандин регьберди телеф хьайибурун багърийриз ва мукьвабуруз башсагълугъвал гана.
Махсус серенжемдин иштиракчи, жуьрэтлувиляй хейлин шабагьралди къейд авур аскер Рафик Забитован имиди куьмек гунай региондин Кьилиз сагърай лагьана: «Чи государство ва республика патал четин вахт алукьнавай и макъамда республикадин кьиле военный, телефвал, къурбандвал гьихьтин кар ятIа чизвай кас хьун хъсанвал я. И рекьяй чаз бахтуни ганва. Рухваяр махсус серенжемда авай диде-бубайрини куьмек гьиссзава.
Зи хтулди сифте йикъарилай серенжемда иштиракна. Ада заз гьамиша лугьудай: «За гъалибвал къазанмишдалди женг чIугвада!» Ахцегь райондин Чеперин хуьряй махсус серенжемда вишелай виниз кьегьалри иштиракзава. И йикъара чна аскерриз хейлин суьрсет рекье туна. Гьам серенжемда иштиракзавайбуруз, гьам аскеррин хизанриз, диде-бубайриз куьмек гудайла сифте жергейра авай Куьн сагърай, Сергей Алимович. Чи Ватан, государство хуьн чи буржи я», — лагьана Багъир Забитова.
Аскеррин хизанриз государстводин патай гузвай куьмекдикай ва маса кьезилвилерикай РД-дин военный комиссар Дайтбег Мустафаева ва РД-дин зегьметдин ва яшайишдин рекьяй вилик финин министр Мурад Къазиева лагьана. И рекьяй тухузвай кIвалахдикай бязи муниципалитетрин кьилерини ихтилатна.
Гуьруьшдин вахтунда региондин Гьукуматдин членри аскеррин багърийри къарагъарай са шумуд месэла гьялун патал фикирдиз къачуна. КIеве авай хизанриз куьмек гун Дагъустандин Кьили вичин гуьзчивилик кутунва.
Чи мухбир
