Дагъустандай тир чпихъ «Ленинград хуьнай» медаль, «Гьалкъада авай Ленинграддин агьали» лишан авай Ватандин ЧIехи дяведин ирид ветерандиз 48 агъзур манатдин кьадарда аваз са сеферда гудай выплата тайинарнава. Идакай РФ-дин Яшайишдин фондунин Дагъустанда авай отделенидин пресс-къуллугъди хабар гана.
Чешмедин малуматралди, пулдин такьатар ветеранрив декабрдин ва 2024-йисан январдин варцара агакьда. Къейд ийин хьи, 27-январдиз Ленинград фашистрин гьалкъадикай азадайдалай инихъ 80 йис тамам жезва. РикIел хкин, немсери шегьер 872 юкъуз гьалкъада кьунай ва и зулум 1944-йисуз куьтягь хьана. И девирда, жуьреба-жуьре делилралди, 600 агъзурдалай гатIунна 1 миллионни зурал агакьдалди инсанар телеф хьана.
Са сеферда гузвай выплата РФ-дин Президент Владимир Путинан Указдалди тайинарнава. Ам алай вахтунда Латвияда, Литвада, Эстонияда, Абхазияда, Кьиблепатан Осетияда ва Приднестровьеда яшамиш жезвай ветеранриз чара ийида.
Агьмед Магьмудов
