Ислен юкъуз РД-дин Гьукуматдин Председатель Абдулмуслим Абдулмуслимован регьбервилик кваз кьиле фейи заседанидал республикадин яшайишдин жуьреба-жуьре хилериз талукь месэлаяр веревирдна. Абурукай сад республикада официальнидаказ кIвалах тийизвайбурун (яни къанунди истемишзавайвал, икьрар кутIун тавуна, налогар тагуз кIвалахзавайбурун) кьадар тIимиларунихъ галаз алакъалуди тир.
Премьер-министрди хабар гайивал, алай вахтунда Дагъустандин экономикадин 40-50 процент садазни аквазвач, яни хъендик ква. РФ-дин зегьметдин ва яшайишдин рекьяй хуьнин министерстводин делилралди, республикада официальнидаказ кIвалах тийизвай агьалийрин кьадар 330 агъзурдалай алатнава.
А.Абдулмуслимован фикирдалди, ихьтин гьаларихъ хъсан гележег авач. Сад лагьайди, региондин бюджетдиз къвезвай налогрин кьадар тIимил жезва, кьвед лагьайди, жуьреба-жуьре карханайра зегьметдин икьрарар кутIун тавуна кIвалахзавайбурухъ авай яшайишдин ихтиярар хуьз жезвач, пуд лагьайди, ришветбазвили цуьк акъудзава ва икI мад.
«Лезги газет»
