Йикъан месэла

Центральный ва Дагъустандин телеканалрай тIебии газ ишлемишзавай агьалийриз 2024-йисан 1-январдалди  газдин идарайрихъ галаз газдалди таъминарун ва газдин тадаракар ремонт авун патал цIийи икьрарар кутIунна кIанзавайдакай малумарна. Эгер 1-январдалди и кар тавуртIа, кIвалер газдикай хкуддайдакайни лагьана. Месэла, гьелбетда, важиблуди ва агъзурралди инсанрихъ галаз алакъалуди я. Мумкин я, гзафбуруз и кардикай хабарни тахьун. Гьавиляй и месэладай тамамвилелди кьил акъудун патал чна «Газпром газораспределение Махачкала» АО-дин пресс-къуллугъдив са шумуд суал агакьарна ва ада гъиле-гъил аваз жавабарни гана.

– ЦIийи икьрарар нихъ галаз кутIунун герек я?

— 2023-йисан 1-сентябрдилай «Россиядин Федерацияда газдалди таъминарунин гьакъиндай» закон, РФ-дин яшайиш­дин­ кодекс ва газ ишлемишуниз талукь къайдаяр къуватда гьатнава. Абурун бинедаллаз яшайишдин кIвалерин газдин та­даракар ремонтзавай ва техникадин рекьяй къуллугъзавай махсус организацийривай ийизвай истемишунар дегишарнава­.

ЦIийи закондин бинедаллаз, яшайишдин кIвалерин газдин тадаракриз къуллугъдай ихтияр анжах газ турбайриз ахъайзавай ва газдалди таъминарзавай сетриз ава. Дагъустанда ахьтин ихтияр авайбурук акатзава: «Газпром газораспределение Махачкала» АО, «Газпром газораспределение Дагестан» ООО ва «Даггаз» ОАО.

Гзаф квартирайрин кIвалера яшамиш жезвай агьалийри 2023-йисан 31-декабрдалди кIвалера авай газдин тадаракар ремонт ва абуруз къуллугъ авуниз талукь икьрар мажбури яз цIийи кьилелай кутIун хъувун лазим я. Икьван гагьди техничес­кий рекьяй къуллугъ авуниз хас тир махсус маса организацийрихъ галаз кутIуннавай икьрарар 2024-йисан 1-январдалди къуватда амукьда.

Хсуси кIвалерин иесийрини чпиз технический рекьяй къуллугъ авун патал газораспределительный организациядихъ галаз цIийи кьилелай  икьрар кутIун хъувун лазим я. Абуруни газдин махсус маса идарайрихъ галаз виликдай кутIуннавай икьрарар 2024-йисан 1-январдалди къуватда амукьда.

– Куь пешекарар кIвалериз мус ва гьикI къведа?

— ЦIийи закондин бинедаллаз, кIвалера авай газдин та­дарак­риз анжах газдин турбайриз газ ахъайзавай ва адалди агьалияр таъминарзавай организацийривай къуллугъ ийиз жеда. Икьрар кутIунайдалай гуьгъуьниз газораспределительный организация технический рекьяй вичин везифаяр тамамарунив эгечIда. Пландик кутунвай ахтармишунар йиса са сеферда ийида.

Махсус идарадин къуллугъчийрал вили рангунин партал жеда. Парталдал талукь идарадин тIвар («Газпром газораспре­деление Махачкала») кхьенваз жеда. Ахтармишунар ийиз физ­вай къуллугъчийрив удостоворение, алатар авай чантани хьун чарасуз я.

– Икьрар кутIундайла гьихьтин документар герек жеда?

— Паспорт, кIвалин иеси тирди тестикьарзавай документ, СНИЛС, ИНН, кIвале  ишлемишзавай газдин тадаракрин марка, акъуднавай йис.

– ЦIийи кьилелай икьрар кутIун хъувун кIвалерин иесидиз квяй акъвазда?

— Технический рекьяй къуллугъ авуниз талукь яз кутIун хъийизвай икьрар пулсузди я. Икьрар кутIун хъувун патал «Газпром газораспределение Махачкала» АО-дин, «Газпром газораспределение Дагестан» ООО-дин офисриз, газдин учас­токриз, муьштерийрин (клиентрин) центрайриз ва абонентрин пунктариз фена кIанда. Адресар, телефонрин нумраяр компанийрин сайтрай чириз жеда.

Гзаф квартирайрин кIвалера яшамиш жезвай агьалийривай газораспределительный организацийрин гьакъиндай герек малуматар чпин къуллугъда акъвазнавай домоуправленийрай, ТСЖ-рай, ЖСК-рай чиризни жеда.

Газдалди таъминарзавай организациядихъ галаз икьрар кьилди кIвалин иесидивай ва я виридан тIварунихъай домоуп­равленидивай, ТСЖ-дивай, ЖСК-дивайни кутIуниз жеда. Анжах абурув умуми собранидал икьрар кутIуниз ихтияр ганвайвилин гьакъиндай къарар гваз хьана кIанда.

– ЦIийи йисалди икьрар кутIуниз тахьайтIа, вуч жеда?

— Газ ишлемишиз кIанзавай гьар са агьалидихъ техничес­кий рекьяй къуллугъ авуниз талукь икьрар хьун лазим я. Та­хьайтIа, ам газдалди таъминардач. Икьрар кутIунуникай кьил къакъудайбур­ административный жавабдарвилизни чIугвада. Яни 1-2 агъзур манат жерме ийида. Гьавиляй куь газет кIел­завайбуруз меслят гузва, яргъал тевгьена, кIвалера авай газдин тадаракриз къуллугъ авун патал икьрарар кутIуна. Газдин тадаракар гьамиша къайдадик кваз хьана кIанзавайди я. Хаталу дуьшуьшар тежедайвал.

Хийир Эмиров