27-октябрдиз РФ-дин просвещенидин министерстводин буйругъ пайда хьана – ада «Чирвилер къачунин карда кьетIен агалкьунрай» I дережадин (къизилдин) ва II дережадин (гимишдин) медалар гунин къайда ва шартIар тестикьарзава.
ИкI, малум жезвайвал, къизилдин медаль къачун патал нетижаяр кьазвай къиметар вири «лап хъсанбур» хьун лазим я. Идалайни гъейри, ученикди урус чIалай ва мад са тарсунай ЕГЭ-дай 70 баллдилай тIимил тушиз къазанмишун чарасуз я.
Гимишдин медаль къачун патал нетижаяр кьазвай къиметрин арада «кьудар» кьведалай гзаф тарсарай хьун лазим туш. Идалайни гъейри, урус чIалай ва мад са тарсунай ЕГЭ-дай 60 баллдилай тIимил тушиз къазанмишун чарасуз я.
РФ-дин просвещенидин министр Сергей Кравцован гафаралди, «Чирвилер къачунин карда кьетIен агалкьунрай» кьве медалдини ЕГЭ-дин нетижайрал алава тир баллар гуда. Абитуриентриз гимишдин медалдай вини кьил 3 балл, къизилдиндай – 5 баллдив агакьна гуда.
Школайрин къизилдин ва гимишдин медалрин чинин патал РФ-дин гербдин шикил ала. Кьулухъ патал – ачух ктаб ва зейтундин хел. Медалрин диаметр — 40 миллиметрдиз, яцIувал 3 миллиметрдиз барабар я. Къизилдин медалар латундикай гьазурзава ва абуруз 0,5 микрондин къатуналди къизилдин яд гузва. ГьакIни къизилдин къат алачир медалрин жуьреярни ава – ам хьун-тахьун мектебди тайинарзава.
«Чирвилер къачунин карда кьетIен агалкьунрай» II дережадин медалар школаяр акьалтIарзавай жегьилривай 2023/2024 лагьай кIелунин йисалай къачуз жеда. Талукь тир къанундал къул РФ-дин Президент Владимир Путина 4-августдиз чIугуна.
Ж.Саидова
