Октябрдин эхиримжи йикъара Госдумадин депутатрин дестеди («Сад тир Россия») мектебра кIелзавай аялри тарсара алакъадин такьатар, гьа жергедай яз смартфонар ишлемишунин кар гуьнгуьна твазвай законопроект килигун патал теклифна. Документди «РФ-да образованидин гьакъиндай» закондик дегишвилер кутун теклифзава.
Кьилди къачуртIа, къанунда школада кIелзавай аялриз «тарсар тухузвай вахтунда алакъадин такьатар ишлемишдай ихтияр авач» лагьай гафар ачухдаказ кхьин теклифзава. Дегишвилерин текстинин бинедаллаз, алакъадин такьатар (телефонар) аялриз тарсарин вахтунда анжах чарасуз, тади куьмек герек дуьшуьшра ишлемишдай ихтияр ава. Алай вахтунда кардик квай законди, къейдзавайвал, мектебда кIелзавай аялри алакъадин такьатар тарсара ишлемишунин месэла сакIани гуьнгуьна твазвач.
И теклиф гайибурукай сад тир Госдумадин просвещенидин комитетдин кьил Ольга Казаковади гъавурда твазвайвал, аялри телефонар гьина тун лазим ятIа мектебди абурун диде-бубайрихъ галаз веревирд авун лазим я.
РФ-дин просвещенидин министр Сергей Кравцова гъавурда твазвайвал, телефон ишлемишунин къайдайриз талукь законди абур школада ишлемишунал тамамдаказ къадагъа эцигзавач.
«Ученик вичин диде-бубадихъ галаз датIана алакъада хьун лазим я, амма чирвилер гузвай вахтунда мобильный алакъадин такьатар анжах муаллимдин ихтиярдалди ишлемишдай ихтияр ава», — лагьана ада.
И жигьетдай арадал къвезвай чуьруькдин гьалар, министрди гьисабзавайвал, школадин директорди арадай акъудун лазим я.
Ж.Саидова
