30-октябрдиз Дагъустан Республика­дин Кьил Сергей Меликова призывдин комиссиядин заседание кьиле­ тухвана. Анал вахт алай къуллугъдин зулун призыв кьиле физвай, икь­рардин бинедаллаз агьалияр къуллугъдал желб ийизвай гьалариз ва гуьгьуьллубурун «Каспий» батальон тешкилунин месэлайриз килигна.

Дагъустандин военный комиссар Дайтбег Мустафаева октябрдин-де­кабрдин варцара агьалийриз армияда къуллугъ авуниз эвер гузвай кар гьикI кьиле физватIа, гьадакай лагьана.

Адан гафаралди, и кIвалах графикдин бинедаллаз адетдин­ къайдада кьиле физва. Армия­диз эвер гузвайбур герек вири шейэралди таъминарнава ва абур, пландихъ галаз кьадайвал, Россиядин армиядин  жуьреба-жуьре частариз рекье твазва.

«Сифте вацра  армиядиз эверна кIанза­вайбуруз талукь пландин са пай тамамарнава. Республикадин шегьерра ва районра  авай  кьадар жегьилриз килигайла, региондин вилик эцигнавай везифаяр чавай еридивди кьилиз акъудиз жеда. Гьа са вахтунда лугьун лазим я хьи,  армияда къуллугъ авуникай кьил къакъудзавайбур, цIийи закондин бинедаллаз, административный­ ва гьакI уголовный жавабдарвилизни чIугва­да», — къейдна республикадин военкомди.

Ада мад сеферда малумарна хьи, армиядин жергейриз эверзавай жегьилри Украинада кьиле физвай махсус серенжемда иштиракдач. Алатай йисуз армиядиз эвер гайи аскерар хквезва ва абур чпин кIвалериз хъфизва, чеб яшамиш жезвай чкада военный учетда акъваззава, — лагьана Д.Мустафаева.

Вичин рахунра военный комиссарди  призывдиз талукь планар  бегьемвилелди кьилиз акъуд тийизвай муниципалитетарни раижна.

Региондин регьберди муниципалитетрин кьилериз чкадин призывдин комиссийрин кIвалах хъсандиз тешкилунин ва и кардал талукь идараяр ва общественный организациярни желб авун теклифна.

«Гатфарин призывдин гьакъиндай чна планар кьилиз акъудна. Исятдани чна и важиблу кар хъсандиз тешкилна­ ва военный комиссариатриз яш тамам­ хьанвай жегьилар гъидайвал авуна кIан­да. И жигьетдай квехъ районра, шегьерра призывдин кIвалах вини дере­жада аваз тешкилдай вири мумкинвилер ава. Са бязи районра и кIвалах хъсандиз тешкилнава. Мисал яз, Казбек, Табасаран, Хасавюрт районра. Бязи чкайра и месэла талукь регьберри чпин гуьзчивиликай хкуднава. ИкI хьун лазим туш», — лагьана Сергей Меликова.

РД-дин Хатасузвилин рекьяй Советдин секретарь Мегьамед Баачилова икьрардин бинедаллаз агьалияр военный къуллугъдал желб ийизвай месэладикай лагьана. Идан гьакъиндай агьалийрин арада гъавурда тунин кIвалах тухузва. Дагъустанда гуьгьуьл­лубурун «Каспий» батальон  тешкилунин месэла акьалтIарнава.  Ам гуьгьуьл­лубурун «Терек» бригададик акатда.

Сергей Меликова гуьгьуьллубурун батальон тешкилунин карда активнидаказ иштиракай муниципалитетрин кьилериз сагърай лагьана.

«Республикада гуьгьуьллубурун умуд­лу къурулуш арадал гъанва. Чна ам герек вири шейэралди таъминарна. Кьвед-пуд йикъалай батальон  чпиз тайинарнавай чкадиз фида. Идахъ галаз сад хьиз, чна абур вахтуналди жедай мулкунал, спонсорри чара авунвай такьатрикай менфят къачуна, абур яшамиш жедай чкаяр туькIуьрнава. Идалай гуьгъуьнизни чна, шегьеррин, районрин администрацийрихъ галаз санал, гуьгьуьллубурухъ галаз датIана алакъа хуьда. И батальондиз чавай рикIивай  «кIвалах ая, стхаяр!», — лугьуз жеда, — куьтягьна вичин ихтилат Дагъус­тандин регьберди.

Чи мухбир