ДГПУ-дин — 80 йис
12-октябрдиз РД-дин Кьил Сергей Меликова Дагъустандин государстводин педуниверситетдин 80 йисан юбилей къейд авунин мярекатра иштиракна. Хайи югъ къейд авунин сергьятра аваз вуздин мулкунал «Муаллимдиз ва насигьатчидиз» тIвар ганвай памятник ачухна.
Шад мярекатдал Сергей Меликова, муаллимриз ва студентриз сувар тебрикайдалай кьулухъ, идарадин юбилейдин йис Россияда малумарнавай Муаллимдин ва насигьатчидин йисал ва шаир Расул Гьамзатован 100 йис къейд авунин вахтунал ацалтун лишанлу кар тирдакай лагьана.
Региондин регьбердин гафаралди, скульптурадин композициядалди идалай вилик чи республикадиз атай, кьакьан дагъдин хуьрера авай аялриз кIелиз-кхьиз чирай «сифтегьан» муаллимриз, гьакIни региондин гьар жуьре хилера зегьмет чIугвазвай насигьатчийриз гьуьрмет малумарзава, Дагъустан виликди тухунин кардик пай кутурбурун зегьмет къейдзава.
Сергей Меликова гьакIни алай вахтунда СВО-дин мулкара авай дагъустанвийрин къагьриманвал, жуьрэтлувал кьетIендаказ къейдна: «СВО-дин мулкунал алай вахтунда Ватандин итижар хуьзвай военный къуллугъчияр, гуьгьуьллубур дагъвийрин асул ивиррал – Ватандал рикI хьунин, камаллувилин, регьимлувилин, инсанвилин, чIехибуруз гьуьрмет авунин ва аялрал рикI хьунин гьиссерал алаз тербияламишнава. И жигьетдайни заз Ватан хуьдай халисан кьегьалар тербияламишунай абурун насигьатчийриз, классрин руководителриз рикIин сидкьидай гьуьрмет малумариз кIанзава. ГьакIни заз къе, чпин хизанар республикада туна, уьлкведин цIийи мулкарал кIвалахзавай 14 муаллимдин кьегьалвал, игитвал къейд ийиз кIанзава. Чна абурал дамахзава ва вирида санал абуруз куьмек гузва».
Вуздин юбилейдин мярекатда гьакIни Россиядин просвещенидин министрдин заместитель Татьяна Васильевади иштиракна. Ада ДГПУ-див федеральный идарадин руководитель Сергей Кравцовалай тебрикдин гафар агакьарна.
«Республикада муаллимар яргъал йисара и гуьзел университетдин сергьятра гьазуриз хьанай. Им Дагъустандин вири муаллимрин кIвал я. Къенин юкъуз вуз вири патарихъай виликди физва, ада вахтунин истемишунриз жаваб гузва, гьа са вахтунда ада адетарни хуьзва. Идакай а кардини шагьидвалзава хьи, юбилейдин йисуз университетдиз Расул Гьамзатован тIвар ганва. Къуй квехъ яратмишунра, илимда агалкьунар, рази тир студентар ва ученикар мадни гзаф хьурай», — лагьана ада вуздин коллективдихъ элкъвена.
Мярекатдин мугьманар патал «Дагъустандин майданар» выставка тешкилнавай, ана республикадин шегьерри ва районри сеняткаррин ва художественный искусстводин чешнеяр майдандиз акъудна, милли тIуьнар гьазурна.
Университетдин бине кутурдалай кьулухъ 80 йис тамам хьунин шад вакъиа къейд авунин сергьятра аваз Сергей Меликова вуздин тафаватлу хьайи къуллугъчийриз госнаградаяр гана. Ада республикадин муаллимриз ва насигьатчийриз намуслудаказ кIвалахунай баркалла лагьана.
«Алатнавай цIудралди йисара вузда гзаф кьадар дегишвилер кьиле фенва. Инай гьам республикада, гьамни адалай къерехда машгьур тир муаллимар, алимар, сиясатчияр акъатна. Абурукай гзафбуру хайи вуздин тарихдин умуми ктабдин чинра лайихлу чка кьунва ва и кар давамни хъийизва. Къенин юкъуз вузда 10 агъзурдалай гзаф студентри чирвилер къачузва. Квелай, гележегдин муаллимрилай, куь гьакъисагъвилелай ва пешекарвилелай аслу я чавай вахтуни ийизвай истемишунриз жаваб гуз алакьун, чи пакадин югъ», — кьетIендаказ къейдна Сергей Меликова.
Университетдин къуллугъчийрихъ галаз гуьруьшдал Дагъустандин Кьили вич вуздин месэлайрихъ галаз 3 йис идалай вилик сифте яз таниш хьайи вахт рикIел хкана. Ада малумарайвал, са шумуд йисан вахтунда ДГПУ четин гьалда аваз хьана. Адан гафаралди, а чIавалай инихъ университетда виле акьадай хьтин дегишвилер хьанва: Алимрин совет арадал хканва, аспирантурадин программайрай чирвилер гуз башламиш хъувунва, вузди 160 миллион манат бурж вахкунихъ галаз алакъалу гьахъ-гьисабар тамамдаказ авунва, къуллугъчийрин мажибар хкажнава, дараматда ремонтдин кIвалахар тамамарнава, магистратурадин цIийи хилер пайда хьанва.
ДГПУ-дин ректор Нариман Асварова вуздиз датIана куьмек гунай Сергей Меликоваз чухсагъул лагьана.
РикIел хкин, къенин юкъуз ДГПУ-ди республика патал педагогвилин кадрияр гьазурунин къурулушда кIвенкIвечи чка кьазва ва ам Кеферпатан Кавказдин мулкунал виридалайни чIехи университетрикай сад я. Вузда тахминан 750 касди кIвалахзава ва 10 агъзурдалай гзафбуру чирвилер къачузва. Адан къурулушдик чирвилер гудай 15 подразделение, 46 кафедра, ара атIун тийиз къачудай образованидин институт, педколледж ва 20-далай гзаф илимдинни образованидин центраяр ква.
Амина Муслимова
