Мегьарамдхуьруьн райондин­ администрациядин пресс-къул­лугъди «Лезги газетдиз»­ хабар­ гайивал, и йикъара Та­гьир­хуь­руьн-Къазмайрал Жуьрэтлу­ви­лин орден кьве сеферда гайи, Рос­гвардиядин (РД-да авай Уп­равленидик акатзавай Махачкъалада кардик квай махсус кьилдин отряддин — спецназ)­  къуллугъчи, майор, Украинада­ кьиле физвай дяведин махсус­ серенжемда (СВО) телеф хьайи Руслан Примоваз памятник ачухна.

Экуь къамат эбеди яз рикIера хуьнин лишан тир и серенжемда Росгвардиядин Махачкъалада кардик квай спецназдин кьилдин отряддин командир, полковник Юрий Указова, игитдихъ галаз санал кIвалахай юлдашри, Дагъус­тандин кьилин ва гьукуматдин администрациядин регьбердин заместитель  –  региондин кьилин ва гьукуматдин администрациядин кра­рин управленидин начальник Наип Сепиханова, Мегьарамдхуьруьн райондин кьил  Фарид Агьмедова, телеф хьайи аскердин багърийри, ярар-дустари  ва хуьруьнвийри иштиракна.

— Русланан уьмуьр куьруьди хьана, амма ам Игит яз чи арадай акъатна. Адан экуь къамат чи рикIера эбеди яз амукьда. Адан диде-бубадиз дерт эхи ийидай къуватар ва сабурлувал гурай, кьегьал хва тербияламишунай абуруз сагърай лугьуз кIанзава, — къейдна кIватI хьанвайбурун вилик Юрий Указова.

Райондин кьил Ф.Агьмедова ви­чин тIвар эбеди яз хуьруьн, республикадин ва уьлкведин тарихда кхьенвай Руслан Примова къалурай кьегьалвилерал хуьруьнвийри дамахдайди, адан тIвар гьамиша инсанрин рикIера амукьдайди къейдна.

— Чна ватанэгьлидин экуь къамат рикIера хуьн ва акьалтзавай несил адан чешнедалди тербияламишун патал чалай алакьдай вири крар кьилиз акъудда, — алава хъувуна ада.

Памятник ачухун Игитдин буба Жамалдин Примовал ва райондин кьил Фарид Агьмедовал ихтибарна.

Гуьгъуьнлай кIватI хьанвайбуру памятникдал цуьквер эцигна. Са декьикьада кисна акъвазуналди, Руслан Примован экуь къамат рикIел хкана.

Рагнеда  Рамалданова