Чилин участокрин сагьибар тир эцигунрал машгъулбурувай (ватандашар, тешкилатар, кьилдин карчияр) МФЦ-дай эцигунар кьилиз акъудунин ихтиярар къачуз жеда.
Муниципальный къуллугърик (услуга) акатзавай и документ пулсуздаказ гузва. Юзан тийидай объект авай чкадиз килигна, талукь тир МФЦ-диз физ жеда. Ихьтин документар къалурун герек жеда:
— паспорт;
— чилин иеси тирди тестикьарзавай документ;
— проектдин документар.
Сад тир пособие
Сад тир пособие тайинарун патал хизанда авай зегьметдиз къабил тир чIехи инсанрихъ кIвалахдай къвезвай официальный къазанжи хьун герек я: стипендия, мажиб, пенсия, карчивиляй къвезвай къазанжи.
Пособие тайинарун патал хизанда авай гьар са нефесдал гьалтзавай къазанжидин кьадар регионда тайинарнавай яшамиш хьунин агъа кIанин кьадардилай тIимил хьун лазим жезва. Эгер къазанжидин патахъай гьахъ-гьисабдай муддатда зегьметдай къачур гьакъи авачиз хьайитIа, ам тахьунин себеб уьмуьрдин гьакъикъи гьаларалди субутна кIанзава.
Налогар – МФЦ-да
КIватI хьанвай налогрин буржар чирдай ва абур гудай мумкинвал республикадин вири «Мои Документы» центрайра (терминалра) ава.
МФЦ-диз фидайла, жував паспорт гваз хьун бес я.
Водителвилин шагьадатнама
МФЦ-дин идарада водителвилин шагьадатнама къачудай мумкинвални ава. Сифте нубатда медсправка туькIуьрун ва госпошлина гун герек я. МФЦ-диз фена, арза ацIурна, шикил яна, пешекардив герек документар вугана кIанда. Гьазур хьайила, МФЦ-дай вахчуз жеда.
Гьихьтин документар герек я? Жаваб: паспорт, водителдин куьгьне шагьадатнама (аваз хьайитIа), медицинадин справка.
МФЦ-да водителдин шагьадатнама дегишариз жезва, эгер: адан вахт куьтягь хьанватIа, водителдин сагъламвилин гьал дегиш хьанватIа, водителдин фамилия дегишарнаватIа, шагьадатнама квахьнаватIа.
И къуллугъ кIвалахдин 15 йикъан къене кьилиз акъудзава.
«Лезги газет»
