Дагъларин уьлкве михьи гьавадалди, тIебиатдин гуьзел ва надир чкайралди, абукевсер булахралди, вацIаралди, дагъларалди, тамаралди, гьайванрин ва набататрин алемралди ва гзаф маса шейэралди, мугьманперес инсанралди девлетлу я.

Дагъустандин надир чкайриз­ килигиз­ къвезвайбурун кьадар йисалай-суз артух хьунни тIебии кар я.

Са рахунни алачиз, СтIал Сулейманан район чи республикада гуьзел пипIерикай сад я. Лагьана кIанда, муниципалитетда туризм вилик тухун патал тайин тир  кIвалах тухузва. И рекьяй «Atlas» бю­роди районда хуьрерин агломерациядин сад лагьай мастер-план туькIуьрунин тIвар кьаз жеда. Вилив хуьзвайвал, мастер-план ­кьилиз акъудайла райондиз 46 агъзурдав агакьна дурумлудаказ туристар атун тешкилиз жеда.

Мукьвара зун Россиядин «НТВ» каналдай «Поедим, поедим!» тIвар алай машгьур передачадиз килигна. Ам кьиле тухузвай Федерико Арнальди СтIал Сулейманан райондиз атанвайди акурла, заз шад хьана.

Асул гьисабдай, и пе­редачада дуьньядин­ халкьарин милли ху­ьре­кар гьазурунин къайдай­­рикай­ суьгьбетзава­. Фе­дерико­ Арнальди Италиядай я. Римдин университет­ акьал­тIарна­­вай ам пешедин рекьяй аш­паз,­­ гьа са вахтунда, музыкантни я. Ви­чиз инги­лис­­, француз, испан, урус, ­болгар, итальян ва польшадин чIалар фасагьатдаказ чизвай­ ада 2018-йисалай «НТВ» каналда «Поедим­, поедим!» передачани кьиле тухузва. Заз малум хьайивал, вичин рикI алай передача гьазурун патал Федерико Ар­наль­ди­ дуьньядин 60 уьлкведа, абурукай яз Рос­сия­дин Федерациядин 82 субъект­да хьана.

СтIал Сулейманан районда ам, передачадай акурвал, лезгийрин милли хуьрек­рихъ, абур гьазурзавай къайдайрихъ, инсанрин мугьманпересвилин адет­рихъ галаз таниш хьана. Кьасумхуь­релай тир Мусинат Дадашевади мугьман Федерико Арнальди хьрак фу ва чIахарин афарар­ гьазурзавай къайдайрихъ галаз танишарна. Мугьманди чи милли хуьрекар дадмишна. Афардин дад акунмазди, Федерикоди лезги чIалалди «ширин я» лагьана.

Са рахунни алачиз, Федерико Арнальди хьтин машгьур ксар-сиягьатчияр атуни ва передачаяр «НТВ» хьтин федеральный каналрай къалуруни СтIал Сулейманан район, санлай Дагъларин уьлкве  алемда машгьурда ва гьа са вахтунда ида чи ерийра туризм вилик тухуниз куьмекда.

Хазран Кьасумов