Куьмек гана
КIелзавайбурун рикIел хкин. Са тIимил вахт идалай вилик, 28-сентябрдиз, чи газетдиз Тагьирхуьруьн-Къазмайрин МААП-дал майишатдин кIвалахар таъминарзавай карханадин са шумуд оператордин къулар алай «Чаз куьмек герек я» кьил ганвай чар акъатна. Абуру сменайралди кIвалахзавай чпиз зегьметдин гьакъи тIимил гузва лугьуз наразивал ийизвай. Редакцияди, адет тирвал, лазим тир серенжемар кьабулун патал наразивилин чар республикадин талукь тир ведомствойриз рекье туна. Анрай чал, яргъал тевгьена, жавабарни агакьна. Абурун гьакъиндай газетда кхьенва. А макъаладай аквазвайвал, газетдивай куьмек тIалабзавай жергедин зегьметчийриз куьмек хьанач.
Гьа са вахтунда чарчин, официальный арзадин — ваъ, чпин гьалдикай хабар гузвай тавакъудин кагъаздин авторри, редакциядиз ихтибар авуналди, чавай, чкадал атана, куьмек гун тIалабзавай. Къал-къуьж авачиз куьмек жедайдахъ абур инанмиш тир. Месэла гьялун патал, чкадал фена, кьил акъудун чарасуз хьана.
Кьилин редактор Мегьамед Ибрагьимова и цIарарин автордиз редакциядин патай тапшуругъ гудайла, рикIел хкана: «Чун, «Лезги газетдин» къуллугъчияр, зегьметчи инсандин гьахълу итижар, законлу истемишунар хуьз гьамиша алахъзавайди я. Умудлу я, и месэлани, хци тахьана, кIвалахзавай ксарин патай наразивал амукь тийидайвал гьялда». Гьа икI, чун редакциядиз атай чарчин авторри кIвалахзавай чкадал фена, абурухъ галаз гуьруьшмиш хьана ва дердидихъ яб акална. Гуьгъуьнлай чун вичихъ галаз рахай карханадин исполнительный директор А.Аликберов ва ахпа и цIарарин автор кархана финансламишзавай адан регьбер Эльдус Аюбовахъ галаз телефондай рахана (алай вахтунда ам республикадилай къеце пата ава).
Чахъ галаз хьайи ихтилатда Э.Аюбова лагьана: «Редакциядиз чар кхьенвайбуру ягъалмишвилеризни рехъ ганва. Зиян авач. Абур зегьметчи инсанар я – хизандин дуланажагъ хъсанариз кIан хьун айибдай кар туш. Гьа са вахтунда директор А. Аликберовни работникар сад-садан гъавурда такьур месэлани хьанва. Гьахъ лагьайтIа, мажибрин патахъай работникрин наразивал авайдакай заз хабар авачир. Месэла гьялун патал, редакция инжиклу тавуна, заз са хабар гун бес жедай. Гила, 1-октябрдилай эгечIна, абуру чеб рази жедайвал хкажнавай мажибар къачуда. Гьакъисагъвилелди зегьмет чIугвазвай инсан бейкеф жедайвал авуна кIанзавайди туш. Вични алай, четин девирда, инсанар сад-садан гъавурда акьуна, арада ихтибарвал мягькемарна кIанзавай девирда». Кьабулнавай къарардикай ада работникризни хабар гана.
Инал Эльдус Талибовича вич зегьметчи инсандин къадир авай, адахъ галаз рахаз чидай, камаллу регьбер тирди къалурна. Амма, гьайиф хьи, виринра акI туш. Идарайрин, карханайрин бязи регьберри, гьукумдин ихтиярар, пулдин къуват хатадай хьиз чпин гъиле гьатуникди кьил элкъвезвай бязи ксари чеб акьалтIай вини, кьетIен дережадин инсанрай кьуна, амайбур инсанрайни гьисабзамач. Им общество, иллаки ватанпересвал, халкьди гьукумдиз ийизвай ихтибарвал патал гзаф хаталу гьал я.
Абдулафис Исмаилов
