13-октябрдиз, нисинин сятдин 2-даз, Махачкъалада, Р.Гьамзатован тIварцIихъ галай милли ктабханада, диндин алим Ямин гьажи Мегьамедован «Пак Къуръандин манайрин таржума – лезги чIалал» ктабдин презентация кьиле фида. Мярекат Алкьвадар Гьасанан тIварцIихъ галай медениятдинни марифатдин центрадихъ галаз санал РД-дин милли сиясатдин ва динрин крарин рекьяй министерстводи тешкилзава.
Къейд ийин хьи, презентацияда республикадин жемиятдинни сиясатдин векилри, алимри, имамри, лезги районрин администрацийрин векилри ва масабуру иштиракда. Адан сергьятра аваз Ямин гьажи Мегьамедован къелемдикай хкатнавай диндин ктабрин выставкани тешкилда.
Ашкъи ва мумкинвал авай гьар са ватанэгьлидивай и мярекатда иштиракиз жеда.
РикIел хкин, Я.Мегьамедован «Пак Къуръандин манайрин таржума – лезги чIалал» ктаб «Лезги газетдин» редакциядай маса гузва. Къимет – 1100 манат.
* * *
26-октябрдиз Москвада, «Президент-Отель» мугьманханадин дараматда, Урусатдин мулкарал Ислам дин атайдалай инихъ 1380 йис тамам хьуниз талукьарна международный «Дербентдин Исламдин тарихдинни медениятдин ирс: чирун, хуьн ва машгьур авун» илимдин конференция кьиле фида.
Мярекатдин тешкилатчийрин арада ФЛНКА, РАН-дин востоковеденидин Институт ва Алкьвадар Гьасанан тIварцIихъ галай медениятдинни марифатдин центр ава. Конференция миллетрин крарин рекьяй Федеральный Агентстводин ва РАН-дин Дагъустанда авай центрадин тарихдин, археологиядин ва этнографиядин Институтдин куьмекдалди тешкилзава.
Къейд ийин хьи, конференцияда алимрилай, тарихчийрилай, журналистрилай гъейри, жемиятдин ва сиясатдин векилри, къецепатан уьлквейрай къвезвай мугьманри иштиракда. Мярекатдин кIвалах кьве секцияда кьиле фида: «Дербент — VII-XIII асирра Кавказда Исламдин чIехи центр» ва «Урусатдин мулкарал Исламдин 1380 йис: руьгьдин ирс ва вилик финин еришар».
Конференциядин программадикай гегьеншдиз «Лезги газетдин» сайтдай кIелиз жеда.
«ЛГ»
