19-сентябрдилай 15-сентябрдалди чи республикада «Хатасуз рекьер» лишандик кваз Вирироссиядин онлайн-олимпиада кьиле фида. Алатай 4 йисуз ана 10,5 миллион школьникди иштиракна. Идакай чаз РД-дин транспортдин министерстводин пресс-къуллугъди хабар гана.
Эхиримжи са шумуд йисуз кьиле тухузвай и серенжемдин тешкилатчияр Россиядин транспортдин министерство, МВД-дин ГУОБДД, РФ-дин просвещенидин министерстводин ва «Хатасуз ва ерилу рекьер» милли проектдин куьмекни галаз «Милли приоритетар» АНО я. Ада 1-9-классра кIелзавай аялриз рекьерин гьерекатдин къайдайрай чирвилер артухарзава.
— Рекьин гьерекатдин иштиракчийрин хатасузвал артухарун – им «Хатасуз ерилу рекьер» милли проектдин виридалайни кар алай месэла я. Аялрин хатасузвилиз мадни еке фикир гузва. Милли проектдин сергьятра аваз чна рекьер къайдадиз гъизва, жуьреба-жуьре технологийрикай менфят къачуналди, рекьерин инфраструктура вилик тухузва. Чпин чирвилер школьникривай олимпиадада иштиракуналди ахтармишиз жеда, — хабар гузва РФ-дин Гьукуматдин председателдин заместитель М.Хуснуллина.
— Аялрихъ ва жаванрихъ галаз профилактикадин кIвалах кьиле тухун Госавтоинспекциядин кIвалахдин кар алай месэлайрик акатзава. Маса ведомствойрихъ ва организацийрихъ галаз санал и категориядихъ галаз кIвалахдай тегьер тайинарзава. Онлайн-викторинадин хиляй тапшуругъар хатасузвал таъминарунин рекьяй кар алай меэлаяр фикирда кьуналди хкязава. Итижлудини а кар я хьи, и серенжем чирвилеринни акъажунрин жуьреда кьиле тухузва. Ана кIамай кьван ксаривай иштиракиз жеда, гьа гьисабдай яз, муаллимривай ва диде-бубайривайни. Ихьтин серенжемдин макьсад лагьайтIа, санлай уьлкведин рекьера телефвилер тежедайвал авун я, — къейдзава Россиядин МВД-дин ГУОБДД-дин начальник М.Черникова.
Олимпиада образованидин «Учи.ру» платформадал кьиле фида. Ана иштиракун патал хсуси кабинетдай онлайн-платформада регистрация авуна кIанзава. Олимпиададин тапшуругъар аялрин яшариз килигна кьве блокдиз пайнава: 1-5 ва 5-9-классрин аялар патал.
Олимпиададикай гегьеншдиз национальныепроекты.рф сайтдай кIелиз жеда.
Регина Семедова
