Къайгъударвал герек я
Пеше себеб яз, зун гзаф мярекатра жезва. Сана са камаллу касди лагьай «хайи чIалар хуьн милли адетар хуьнилай, диде-бубадив эгечIзавай тегьердилайни аслу я» гафар рикIел аламукьна. Ада, вичин гележегдикайни фикир тавуна, са шумуд йисуз начагъ дидедихъ гелкъвей рушакай ихтилатнай. Касди залда авай жегьилриз диде-бубадин хатур тахуниз, абурун къуллугъда гьамиша са кIвачел акъвазуниз, абурун гьакъиндай къайгъударвал авуниз эвернай.
И рахунри гзафбуруз таъсирнай. Зи рикIел жуван хуьруьнви, Ватандин ЧIехи дяведин иштиракчи, набут итим Мегьамедэмин Нежведилов хтана. Уьмуьрдин юлдаш рагьметдиз фенвай ва яшар 80 йисалай алатнавай ветерандихъ хейлин йисара чIехи хцин свас гелкъвенай.
Им гьакъикъи инсанвал, ахлакьвал я. Амма уьмуьрда маса, туькьуьл дуьшуьшарни гьалтзава эхир. Яшлу диде-буба кваз такьазвай, абуруз уьмуьр мадни чIулаварзавай, са патайни куьмек агакь тийиз тек амукьзавай.
РикIел мад са кар хквезва. Редакциядиз Махачкъаладин кьуьзуьбурун интернатдай чар атана. Ана яшар кьудкъадалай алатнавай, Ватандин ЧIехи дяведин иштиракчи хьайи, ахпани хизан, общество патал еке зегьметар чIугур касди вичин рухвайрилай шел-хвалзавай. Вич интернатда тунвайвиляй, вичин патав са касни къвен тийизвайвиляй.
Чун адан патав фенай, са шумуд сятда къвалав ацукьна рикIиз зуз, вилерал стIалар акьулддай адан суьгьбетдихъ-арзадихъ яб акалнай. Касдин эхиримжи гафар къени бейнидай акъатзавач: «Ина захъ гелкъвезва, са куьникайни дарвал авач, амма рухваяр, рушар аваз зун и чкада хьуни рикI пад-падзава. Хабар кьурбуруз за зун гьинай ятIани лугьузвайди туш, жуван хуьрел, райондал айиб тагъун патал». Багърияр авай са касни ихьтин эхирдал татурай.
Гьар садаз чизва, диде-бубадин къуллугъда акъвазун, кьуьзуь, начагъ хьайила, абурухъ гелкъуьн гьар са веледдин буржи я. И везифа кьилиз акъудзавай веледрилай неинки багърияр, гьакI къуншиярни, хуьруьнвиярни рази жезвайди я. Абур масадбуруз чешне язни къалурзава.
Гена чи гьукуматди кьуьзуьбурун гьакъиндай къайгъу чIугвазва, абур пенсийралди, маса кьезилвилералди таъминарзава. Кас амачирбур интернатра, социальный метлебдин маса идарайра хуьзва. Махачкъалада, Дербентда, Буйнакскда ва Вини Казанищеда кардик квай кьуьзуьбурунни набутрин интернатра пуд вишев агакьна дагъустанвияр ава. Интернатар республикадин бюджетдин гьисабдай хуьзва. Больницайра абурун сагъламвал мягькемардай серенжемар кьиле тухузва. Суваррин йикъариз яшлубурун патав республикадин, общественный тешкилатрин векилар физва, абурун гуьгьуьлар хкаждай мярекатар тешкилзава. Бес веледар? Абурун хивени зурба жавабдарвал авайди я эхир.
Хийир Эмиров
