18-июлдиз Кьурагь райондиз «Дагъустан» ГТРК – «Россия» каналдин корреспондент Патимат Мегьамедова ва и каналдин оператор Бейбулат Аскаров мугьман хьана.

Кьурагь райондин администрациядин пресс-къуллугъди хабар гузвайвал, телеканалдин къуллугъчийрин макьсад Россиядин Игит Зейнудин Батмановакай фильм туькlуьрун я.

З.Батманов 2015-йисан 15-майдиз Кьурагь ва Сулейман-Стальский районрин сергьятдал алай тама террористри вагьшивилелди кьенай.

Кьурагь райондин кьили тапшурмишуналди, телевиденидин мугьманар ветеранрин ва агъсакъалрин Советрин председатель Фахрудин Мирзоева, медениятдин, информациядин ва печатдин центрдин къуллугъчи Имирбег Юзбегова, Зейнудинан чlехи стха Батман Батманова ва масабуру кьабулна.

Абур вири Игитдин хизан яшамиш жезвай кlвализ фена, Игитдин дидедихъ галаз ва адан юлдаш Жамиля Халидовнадихъ галаз ихтилатарна. Гуьгъуьнлай абур Игитдин сурал ва боевикри ам ягъай чкадал фена.

Россиядин Игит Зейнудин Батмановакай туькlуьрзавай фильм мукьвара раиж жеда.

«Лезги газет»