(Эвел – 36-37-нумрайра)
Аллагьди 15-сурадин 99-аятда лугьузва (мана): «Ва ибадат ая (вуна) ви Раббидиз, та ваз якъин (ажал) къведалди (давамара ви уьмуьрдин эхирдалди)!». «Якъин» — им са шакни авачир шей лагьай гаф я. Кьиникь гьахьтин гьал я. Аллагьди Къуръанда 19-сурадин 31-аятда Иса Пайгъамбардин (къуй Аллагьдин патай саламар хьурай вичиз) гафар гъанва (мана): «Ва Ада зун авунва берекатлуди яз гьина зун хьайитIани, Ада заз эмирнава (гележегда) зал чан аламай кьван вахтунда за капI авун ва закат гун». Инсандал чан аламай кьван ада Аллагьдиз ибадат ийизвайди я. Чир хьухь, инсан гьи гьалда кьенваз хьайитIа, Къияматдин юкъузни ам гьа гьалда аваз къахрагъарда. Мад са кардикай чир хьухь, Аллагьдиз ибадат тийизвай инсанди вичи ибадат авун патал шейтIан ва вичин нефс хкязава ва вичиз хабар авазни, авачизни, гьабуруз ибадат ийизва. (Яни эгер инсанди Аллагьдиз ибадатзавачтIа, ада эхир са куьниз ибадатзавайди я: я а касди шейтIандиз ибадатзава, я – вичин нефсиниз).
Аллагьди Къуръанда 25-сурадин 43-аятда лугьузва (мана): «Акунани ваз (эй, Пагъамбар) вичин гьевесар вичиз гъуц (ила́гьи) яз кьунвайди (вичин нефсиниз кIан хьайи крариз, гьевесриз муьтIуьгъ хьанвайди — ила́гьидиз муьтIуьгъ жедай жуьре), бес, вун жедани ахьтиндал къаюм (ам а кардикай хуьдайди, а кардилай элкъуьрна имандал гъидайди)?!». Абу Гьурайрадин гафарилай агакьарнавайвал, Пайгъамбарди (Аллагьдин салават ва салам хьурай вичиз) лагьана (мана): «Бедбахт гьалда хьурай динардин, диргьемдин, катифдин ва гьамисдин лукI, вич рази яз амукьзавай, эгер адаз хьайитIа (абур) ва эгер тахьайтIа, ажугълу жезвай…» (Бухарий, Ибн Маджах).
Винидихъ тIварар кьунвай шейэрикай динар ва диргьем пул я, муькуь кьве затI (катиф ва гьамис) алукIдай багьа затIар я. Аллагьди хуьрай чун ихьтин пис лукIвиликай.
Инсанди ибадат авун, им ада Аллагьдиз вичин патай шукур къалурун я. Юкъузни йифиз чна чи рикIелди, мецелди, краралди Аллагьдиз, чаз дин кьисмет авунай, шукур гъана кIанда. Исламдай чирвилер къачудай, Къуръандални Пайгъамбардин (Аллагьдин салават ва салам хьурай вичиз) Суннадал асаслу яз дин тухудай мумкинвал хьунай чна Аллагьдиз шукур гъана кIанда. Аллагьди Къуръанда 14-сурадин 7-аятда лагьанва (мана): «Ва (рикIел гъваш, эй зи халкь) куь Раббиди (гьакъикъатда) малумарнава: «Эгер куьне (Заз) шукур авуртIа (къутармиш авунай), За квез, дугъриданни, мадни артухарда (няметар); ва эгер куьне (асивална) инкар авуртIа, гьакъикъатда, Зи азаб гзаф къатиди я!».
Ибадат себеб яз, Аллагьди инсандал малаикар ракъурзава. Абуру адаз куьмек гузва, ам хуьз алахъзава. Ибадат себеб яз, Аллагьди инсандиз виридалай зурба тир Женнетар кьисмет ийида. Гьар жуьредин дережаярни ава Женнетда. Аниз инсан Аллагьдин регьимдалди физва. Бухарийди гъанвай са гьадисдай чаз малум жезвайвал, ферзер кьилиз акъудиз, алава яз сунна крарни ийизвай кас Аллагьдин кIани лукIраз элкъвезва. Килиг садра, Аллагьдин кIани лукI хьунилай еке бахт авани кьван инсандихъ?!
Аллагьди гьи къайдада чун вичин чIехи регьимдик кутазватIа фикир це! Эгер ваз Аллагьдиз кIани лукIарикай жез кIанзаватIа, Аллагь патал ибадат ая, ферзерни суннаяр кьилиз акъуд. Шариатдин текстерай чав хабар агакьнавайвал, Аллагьди Женнетда Вичин кIани лукIариз абурун вилериз такунвай, япариз ван тахьанвай ва рикIериз гьич хиялни татай затIар гьазурнава. Аллагь патал авунвай ибадат себеб яз, регьимлу Аллагьди килиг садра инсандиз гьихьтин затIар гьазурнаватIа…
Аллагьди чи хиве тунвай Исламдин дестекрикай сад гьаж кьилиз акъудун я. И кар мусурманри рикIелай алудна кIандач. Къе мумкинвал авачтIани, мусурмандин рикIик а кар гьамиша хьун герек я. Мумкинвал хьанмазди, гьаж кьилиз акъудун патал себебар авун лазим я. Вучиз лагьайтIа мумкинвал аваз-аваз гьаж кьилиз акъуд тавуртIа, инсан гунагькар жезва. Айишадин (Аллагь рази хьурай вичелай) гафарилай агакьарнавайвал, Пайгъамбаради (Аллагьдин салават ва салам хьурай вичиз) лагьана (мана): «Авач (маса гьахьтин) югъ, Аллагьди азаддай цIукай гзаф (Вичин) лукIар, Арафатдин йикъалай» (Муслим). Гьадисда лагьанвайвал, «Аллагьди кьабул авур гьаждай Женнетдилай гъейри, маса суваб авач» (Ат-Тирмизи). Вич и гьадисдик акатун бес инсандин мурад тушни?!
Къуй Аллагьди чун Вичиз кIани ва Вич кIани лукIарикай авурай! Къуй Аллагьди чун эцигай дуьз рекьелай садрани ахлуд тавурай ва чи эхиримжи нефесдалди дуьз рекьеваз тухурай. Амин!
Гьасамудин Сефибегов,
ДаркIушрин хуьруьн мискIинда худбаяр кIелзавайди
