И йикъара Дербент райондин Агълабрин хуьруьн администрациядин кьил Ариф Мегьамедова­ зун махсус серенжемда иштиракзавай, отпускдиз хтанвай капи­тан­ Фахрудин Рустамбегович Ра­ма­­­зановахъ галаз танишарна.

Фахрудин 1996-йисуз Агълаб­рин хуьре цилингви Рустамбеган хизанда дидедиз хьана. Вичин хизан галаз ам алай вахтунда Москвада яшамиш жезва. Ам Люберцыда «ЛГЖТ»  АО-да ремонтардай механикадин цехдин начальник я.

Агълабрин юкьван школа акьал­­­тlарай 2013-йисуз Фахрудин­ Саратовдин военный институтдиз­ гьахьна. Хъсан чирвилер аваз ин­с­титут акьалтlарай лейтенант­ къул­лугъ ийиз Махачкъалада авай 102­-оперативный къуллугъдин бри­­гададиз ротадин командирвиле­ ра­къурна. Ина къуллугъ авур йисара Ф. Рамазанова Кавказда ва маса регионра кьиле фейи махсус серенжемра иштиракна.

Украинада махсус военный серенжем гатlунай йикъалай ам гьана ава, вичин вилик командирри эцигай везифаяр викlегьдаказ ва жуьрэтлудаказ кьилиз акъудзава.­ 2022-йисан февралдин эхирра ада вичин ротадихъ галаз Запорожьедин атомдин электростанция азадзавай серенжемда иштиракна.

Ф.Рамазанова рикlел хкизвайвал, оборонадин министерстводи­, ротадин иштираквални аваз, атомдин объект азад ийиз тухвай серен­жем  хатасузвилелди кьиле фе­на.

— Сифте ягъунар хьана, — лугьузва ада. — Ана Украинадин нацгвардиядин 200 аскер кьван авай. Къати женгер хьайидалай гуь­гъуь­низ баришугъвилин икьрар ку­тlу­нунин патахъай рахунар кьиле фе­на. Неонацистриз объект хуьз, чпин чанар­ къурбанд ийиз кlан хьанач. Гвай яракьар туна, абур анай экъечlна…

Сентябрдин вацра кьиле  фейи женгера Ф.Рамазанован кьи­­лел ва­ кlвачел залан хирер хьана. Ам кьве вацра госпиталда къаткана. Декабрдин вацра мад вичин къуллугъдин везифайрив эгечl хъувуна.­

Женгера къалурай кьетlен ви­кlегь­вилерай, дирибашвиляй РФ-дин Президент В.В. Путинан Указдалди капитан Фахрудин Ра­ма­занов Г.К.Жукован ва «Дирибашвиляй» медалриз лайихлу хьана­.

— Станция оборонадин министерстводин ас­керри хуьзва. Миллетбазри са шумудра ам вахчун патал гзаф гьерекатар авуна. Амма абурун ниятар кьилиз акъатдач, — лугьузва Ф.Рамазанова. — Чи аскерри ам мягькемдиз хуьзва.

Ф.Рамазанова вичин  уьмуьрдин юлдашдихъ галаз санал кьве веледдиз тербия гузва.

Отпускдиз хтай вахтунда­ ам Дербент райондин кьил М.Ра­гьи­мова кьабулна. Гуьруьшда Ф.Ра­ма­занова вичин къуллугъдикай, кьиле фейи женгерикай, юлдашрикай ихтилатар авуна. Ада райондин кьилиз, СВО-дин иштиракчийриз ва абурун хизанриз гузвай куьмекдай сагърай лагьана.

М.Рагьимова кьегьалрин диде-бубайрин тlварцlихъ хуш келимаяр лагьана ва гъалибвал гваз хтун алхишна.

Къагьриман  Ибрагьимов