2011-йисалай Дагъларин уьлкведин агьалийри чи халкьарин садвилин сувар къейдзава. Алатай гьафтедани дагъустанвияр патал пара метлеблу, итижлу югъ шад гьалара къейдна. Суварин мярекатар неинки 15-сентябрдиз, гьакI адан вилик квай йикъарани тешкилнавай.
Халкьарин садвилин югъ дагъустанвийриз РД-дин Кьил Сергей Меликова тебрикна: «Лишанлу и сувари дагъустанвийриз чпин хайи чил кIанивилин, улу-бубайрин руьгьдин, культурадин ирсиниз, дуствилин алакъайриз, сада-садаз куьмек гунин адетриз вафалувал къалурунин гьакъиндай шагьидвалзава. Сувар 1740-йисарин тарихдин лап кар алай вакъиайриз, вири дагъвияр сад хьана чапхунчияр кукIваруниз талукь азадвилин женгериз талукьарун дуьшуьшдин кар туш.
Дагъустанвийрин гьакъикъи ватанпересвили, виш йисара четин вахтунда сад жез алакьуни, чIехи макьсадар кьилиз акъуддай, муракаб месэлаяр гьялдай, вахтунин эвер гунриз лайихлувилелди жаваб гудай ва чIехи Россиядик кваз уьмуьр давамардай мумкинвал гана.
Республикадин агьалийри зегьметда, женгера къазанмишай агалкьунар, гъалибвилер къенин несилар патал лап хъсан чешнеяр я. Чи кьегьалри алай вахтундани Ватандин итижар хуьн патал дирибашвал, жуьрэтлувал къалурзава. Зун инанмиш я, чна чун патал пак вири ивирар, адетар хуьда, вири четинвилер алудда ва виликди еримишда. Чи садвили чун мадни къуватлу ийида…»
Садвилин сувариз талукь шад мярекатар республикадин вири шегьерра ва районра кьиле фена. Меркездин «Дуствилин кIвале» республикадин музыкадин коллективар, районрин фольклордин ансамблар, студентар, школьникар галаз милли адетрин, хуьрекрин, манийрин, кьуьлерин фестиваль хьана. Шегьерэгьлийриз хуьрекрин дад аквадай, концертдин нумрайриз килигдай мумкинвал хьана.
Аваррин госмуздрамтеатрдин вилик республикадин искусстводин ва культурадин устадри чIехи концерт тешкилнавай. Сувар хореографиядин «Дагъустандин халкьарин дуствилин гам» композиция тамамарунилай (Дагъустандин 14 халкьдин кьуьлер) ачухна. Концертда государстводин Кавказдин халкьарин кьуьлерин «Дагъустандин жегьилвал», манийрин ва кьуьлерин «Дагъустан» ансамблрин, РД-дин филармониядин халкьдин алатрин оркестрдин, Дагъустандин операдинни балетдин теартдин коллективри, эстрададин устадри иштиракна. Эхирдай иштиракчийри Россиядикай мани лагьана.
Меркезда, чи маса шегьерра суварин юкъуз неинки концертар, фестивалар, гьакI спортдин акъажунарни тешкилна.
Садвилин йикъаз талукь мярекатар, чи республикада хьиз, Россиядин бязи регионрани кьиле фена.
Абад Азадов
