Дагъустандин Яшайишдин фондуни хабар гузвайвал, дяведин махсус серенжемда гуьгьуьллувилелди  ва контракт­никар яз  иштиракзавай ксариз (мобилизованные) гьукуматди са жерге кьезилвилер ва пулар гузва. ИкI, СВО-да иш­тиракзавайбурун стаж кьве сеферда артухарзава. Тамамдаказ са йисуз дяведин махсус серенжемда ва я гуьгьуьллубурун кIватIалда  хьайибуруз пенсиядин 3,6 коэффициент гьисаба кьазва. Адетдин агьалийрин пенсиядал йисуз 1,8 коэффициент алава хъжезва.

— Яргъал йисарин стаж авай ксар пенсиядиз экъечIдайла, СВО-да иштиракай вахт  кьве сеферда артухарзава. И категориядик акатзавай ксариз женгинин гьерекатрин ветеранриз хьиз, гьар вацра 3896 манатдин кьадарда аваз пул гузва. Ам къачун патал Яшайишдин фондунин районра ва шегьерра кардик квай муьштерийрихъ галаз кIвалахдай къуллугъриз арза гун лазим я. Идалайни гъейри, винидихъ тIвар кьунвай пул яшайишдин рекьяй къуллугъар хьизни (набор соцуслуг) туькIуьрдай мумкинвал ава. Аник акатзава: дарманрай вахкузвай пул (компенсация), сагъардай чкадиз фидай ва анай хкведай рекьин пул (бесплатный проезд)  ва сагъламвал мягькемарун патал путёвка, — гъавурдик кутазва Яшайиш­дин фондунин Дагъустан Республикадавай Управленидин регьбер М.Исаева.

Адан гафарай мадни малум хьайивал, СВО-дин иштиракчидин сагъламвилиз  хасаратвал ва я адаз тIарвал хьайи дуьшуьш­ра гьукуматди пенсия гузва. Адан кьадарди, группадилай аслу яз, 12-20 агъзур манат тешкилзава.

Чи мухбир