Вичикай духтур хьун Къурбанова Симадин хиялдани авайди тушир. Ингье 4-классда кIелзавай чIавуз ам авай классдиз лацу халатарни алаз, кьилерихъ уьтуь янавай лацу яйлухарни галаз пуд дишегьли – духтурар атанай. Абуру аялриз чеб атунин себеб лагьана ва гьарда вичин рекьяй аялрин михьивилер, сагъламвал ахтармишна. Эхирдай яшдиз чIехиди тир духтурди аялриз лагьана: «Килиг, аялар, гьарда жуван михьивал ая ва вердиш хьухь! Чун, духтурар, михьивилерихъ галаз санал инсанрин сагъламвални ахтармишзавай, герек макъамда куьмекарни гузвай ксар я. И кардиз духтурар мажбур я. РикIелай ракъурмир!»

Иллаки эхиримжи келимайри Симадиз екез таъсирнай. Яраб закай жедач жал духтур? – вичи-вичик фикирарзавай руша, мектебдай  кIвализ хкведайла. И чIавалай ам тарсарал артух алахъиз, духтур хьун патал муаллимривай гьи  предметар хъсандиз чир хьана кIандатIа хабарар кьаз хьана. ИкI, мектебдин йисар акъатна. 1998-йисуз ада Туьркменистандин Чарджоу шегьерда 11-класс лап хъсан къиметралди акьалтIарна. Адан буба, хизанар фадлай гьана яшамиш жезвай. Буба Абдулагь а вахтара гьа патара тIвар-ван авай буругъчи-нефтяник тир.

Сима Кьасумхуьрел хтана. Духтурри лагьай гафар рикIелай тефизвай ада Дербентдин медучилищедиз документар вугана. Ам тарсарал рикIивай алахъзавай. Теориядихъ галаз практикадин чирвилерни тежриба важиблу тирдини ада кьатIанвай. 2001-йисуз Къурбанова Симади медучилище хъсан чирвилер аваз куьтягьна. Адакай райондин больницада, поликлиникада медсестра хьана.

Ам герек ва эверай чкадиз гьасятда фидай. Тамам 8 йисуз ада икI зегьмет чIугуна. Ахпа тежрибалу медсестра терапиядин отделенидиз хкана.  А чIавалай къенин йикъалди Симади начагъдаз вахтунда герек куьмек гуналди кIвалахзава. Отделенидин ва больницадин чIехибуруни Симадин тIвар гьуьрметдивди кьазва, ам чешне яз къалурзава. Кефсузбуру адалай разивалзава.

Райсудин Набиев