Винидихъ тIвар кьунвай чешмедин делилрал асаслу яз, алай йисан алатнавай варцара 500-далай виниз дагъустанвияр яргъал йисарин стаж хьунихъ галаз алакъалу яз пенсиядиз вахт тамам жедалди экъечIна.
— Россиядин Яшайишдин фондунин Дагъустанда авай Управленидин пешекарри алай йисуз чпихъ 42 йисалай тIимил тушиз йисарин стаж авай 486 итимдиз ва чпихъ 37 йисалай тIимил тушиз йисарин стаж авай 32 дишегьлидиз пенсия тайинарунин къарар кьабулнава, — лугьузва Дагъустандин Яшайишдин фондунин пенсияр тайинардай Управленидин регьбер Патимат Абдурагьмановади.
Ада рикIел хкайвал, пенсиядиз экъечIдай вахт тамам жедалди, ам тайинарун патал яргъал йисарин стаж хьунихъ галаз сад хьиз, мадни фикирда ва гьисаба кьазва:
— пенсиядин мажбуридаказ (обязательный пенсионный) страхованидиз талукь яз, Россиядин мулкарал зегьмет чIугурла, налогар гайи вахтар;
— «больничнийриз» (обязательное социальное страхование) талукь яз пособие къачур вахтар;
— армиядин жергейриз эвер гайи вахтар;
— армиядин жергейра авайла, дяведин махсус серенжемда иштиракай вахтар, гуьгьуьллубурун дестейра аваз хьайи (страховой стаж кьве сеферда артухарна гьисабда) вахт.
Страховой стаждик, яни пенсиядиз экъечIдай вахт тамам жедалди, ам тайинардай ихтияр гузвач: бейкарвилин пособие къачунин ва зегьмет чIугуниз такьат авачир агьалияр 1,5 йисал къведалди яшда авай аялрив гелкъуьнин вахтар.
РикIел хкин: пенсиядиз экъечIунихъ галаз алакъалу яз вири патал тайинарнавай умуми вахт тамам жедалди, яни яргъал йисарин стаждилай аслу яз (ФЗ-дин 400-нумра. «Страховой пенсийрин гьакъиндай» закондин 8-статьядин 1.2 паюна къалурнавайвал), агьалийривай ам кьве йис амаз тайинариз жезва.
Чи мухбир
