Россиядин Яшайишдин фондунин Дагъустанда авай Управленидин пресс-къуллугъди (Дагъустандин Яшайишдин фонд) хабар гузвайвал, и йикъара, производствода зегьмет чIугвадайла, бедбахтвилин дуьшуьшрик акатай 13 касдиз «Лада Гранта» маркадин машинар гана. Дагъустандин Яшайишдин фондунин управляющийдин заместитель Николай Жабинан гафаралди, автомашинар кьулан тарцинни кIвачерин хасаратвилерихъ галаз алакъалу тир инвалидрив кьадайвал, яни и категориядик акатзавайбуру рулдихъ чеб къулайдаказ гьиссдайвал ва абуруз машин гьализ регьят жедайвал туькIуьрнава.
Мадни малум хьайивал, дагъустанвийрив агакьнавай машинра кондиционер ва тормозрин АБС къурулуш (антиблокировочная система) ава. Идалайни гъейри, Яшайишдин фондуни машинра ишлемишзавай ГСМ-рин (горюче-смазочные материалы) ва ремонт авунай са пай, машиндин капремонтдайни са сеферда адан къиметдин 30 процент пул вахкуда.
«Эгер производствода зегьмет чIугвадайла, бедбахтвилин дуьшуьшдик акатна, хасаратвал хьанвайдаз лазимвал аваз хьайитIа, и месэлани МСЭ-ди (медико-социальная экспертиза) тайинарда, гьар 7 йисалай машин цIийидалди эвеззава, — рикIел хкизва фондунин малуматда мадни. — Гьайиф хьи, авариядин нетижада еке зарар гайи дуьшуьшра вахт амаз цIийи машин гуз ва я Дагъустандин Яшайишдин фондунин гьисабдай ремонт ийиз жедач. Производствода зегьмет чIугвадайла, хасаратвал хьайи агьалийрин реабилитациядин программадик неинки транспортдин махсус такьат, гьакIни абуруз гьар вацра пулдин такьатар гун, абур сагъламвал мягькемарун патал санаторийризни курортриз рекье тун, дарманралди ва реабилитациядин технический такьатралди таъминарун акатзава».
И йикъара машинар гайи 13 касдикай сад 68 йиса авай Къурбан Хасбулатов я. 1980-йисуз Махачкъаладин ЖБИ заводда кIвалахдайла, адан кIвачин кIан атIана. Гила ада и программадай 3 лагьай машин къачунва. Сад лагьайди «Ока» тир, ахпа – «Жигули». Ингье гила — вири къулайвилер авай «Лада Гранта».
РикIел хкин: автомашин къачун патал Яшайишдин фондуниз арза кхьин лазим я. Мажбури шартI – праваяр аваз хьун ва МСЭ-дин теклиф.
Мадни бедбахтвилин дуьшуьшдик акатнавай касдин реабилитациядин программадик автомашин къачун кутунваз хьана кIанда. Анжах и шартIарин бинедаллаз гуьгъуьнлай Яшайишдин фондуни машин гузва.
Рагнеда Рамалданова
