Чи республикада цIуд йисалай гзаф вахтунда эцигзавай образованидин муьжуьд идара Чирвилерин юкъуз ишлемишиз вахкуда. И барадай месэлаяр РД-дин Гьукуматдин Председателдин заместитель — РД-дин образованидин ва илимдин министр Уммупазиль Омаровадин иштираквал аваз кьиле фейи совещанидал веревирдна.
Ихтилат физвай ирид школадин ва са спортзалдин эцигунриз талукь яз министрдиз муниципалитетрин кьилери — эцигунрин ва объектар ишлемишиз вахтунда вахкунин жигьетдай жавабдар ксари хабар гана.
Авай гьалариз талукь суьгьбетар авурдалай кьулухъ Уммупазиль Омаровади РД-дин образованидин ва илимдин, РД-дин экономикадин ва территорияр вилик тухунин министерствояр эцигунриз талукь месэлаяр чпин гуьзчивиликай хкуд тавунин патахъай тагькимарна. Ведомствойрин уртах комиссиядиз, чкайрал физ, гьар са объект ахтармишун герек тирди лагьана.
Гьа са вахтунда вице-премьерди и эцигунар кьиле физвай районрин ва шегьеррин кьилериз, икьрар хьайивал, вахт-вахтунда харжийриз ва кIвалахар кьиле физвай вахтариз талукь делилар РД-дин Минобрдив агакьарун, эцигунар чпин гуьзчивиликайни хкуд тавун меслятна.
Къейд ийин, яргъал чIугур и эцигунар куьтягь хьана, объектар ишлемишиз вахкунин нетижада ученикар патал цIийи 1750 чка жеда. РикIел хкин, школаяр Къизляр, Тарумовский, ЦIумада, Кьурагь, Сулейман-Стальский, Табасаран районра ва Къизляр шегьерда, спортшкола Хасавюртда эцигзава.
Сулейман-Стальский районда эцигзавай школа амайбурулай екеди, 440 ученикдиз чкаяр авайди, Кьурагь районда 100 ученикдивай кIелиз жедайди ва вичихъ спортзални галайди я.
«Лезги газет»
