СтIал Сулейманан район яша­йишдинни экономикадин рекьерай вилик финик лайихлу пай кутунай, яргъал йисарин намуслу зегьметдай ва 65 йис тамам хьунихъ галаз алакъалу яз райондин муниципальный эменнидин ва чилерин алакъадин управленидин кьилин пешекар Муьгьуьдинов Фазил Аликовичаз райондин кьили Гьуьрметдин грамота гана.

Фазил Муьгьуьдинов михьи рикI, ширин мез, дерин чирвилер авай хъсан пешекар я. И ерияр, секин къилих ада вичин дидедивайни бубадивай къачуна.

Фазилан дах Алик Муьгьуьдинова 1952-йисалай 1967-йисалди Агъул ва СтIал Сулейманан районра чиликай менфят къачунал гуьзчивалдай пешекар (землеустроитель) яз кIвалахна. Диде Мелейсата гзаф йисара «Рычал-су» заводда, райондин заготконторада рабочийвиле, Аламишедин (Эминхуьруьн) гамарин фабрикада халичаяр храдайди яз зегьмет чIугуна. Мелейсат ва Алик Муьгьуьдиноври 2 гадани 2 руш тербияламишна, уьмуьрдин шегьредал акъудна. Ихьтин низамлу, гьуьрметлу, зегьметкеш хизанда чIехи хьайи Фазил Аликовичакай чилихъ галаз алакъалу хилен хъсан пешекар хьана.

Фазил 1958-йисан июлдиз Кьасумхуьрел дидедиз хьана. 1976-йисуз ЦIийи поселокдин юкьван школа лап хъсан къиметар аваз акьалтIарна. Сифтедай ада Дагъустандин Огнидин 3-нумрадин СПТУ-да кIелна, шоферви­лин пеше къачуна, са йисуз пешедай кIвалахна.

1977-йисуз Ф.Муьгьуьдинов Да­гъустандин пединститутдин ху­дожествен­но-графический факультетдик экечIна. 1-курсунай ам Советрин Армиядин жергейриз тухвана. Ватандин вилик пак­ буржи намуслувилелди тамамарайдалай­ гуьгъуьниз ада пединститутда кIе­лун давамарна ва 1984-йисуз анаг акьалтIарна.

Вузди рекье туналди Ф.Муь­гьуь­динова 3 йисуз Чечено-Ин­гу­шетиядин Гудермес шегьердин са школада шикилар чIугунин ва черченидин муаллимвиле кIвалахна. 1986-йисалай инихъ вичин уьмуьр ада чилихъ, адакай менфят къачун къайдада твадай­ кIвалахдихъ галаз алакъалу авуна, дах­дин пеше, ам фейи зегьметдин рехъ давамарна.

Фазил Аликовича сифтедай­ «Даг­гипрозем» институтда ин­­же­нер-земле­устроитель яз кIва­лах­на­­­.

— Гьелбетда, чилихъ галаз алакъалу кIвалах, везифаяр важиблубур я, — лугьузва Фазил Аликовича. – И жигьетдай пешекар чирвилерни герек я. И кар аннамишуналди, кIвалахни ийиз, за Москвадин чиликай менфят къачун къайдада твадай инженерар гьазурдай институтни акьалтIарна.

Ф.Муьгьуьдинова 2016-йисал­ди рай­­онда чиликай менфят къачун къайдада твадай къурулушдин идарайра («Роснедвижимость», «Росреестр») зегьмет чIу­гуна. 2016-йисалай инихъ, райондин муниципальный эменнидин ва чилерин алакъайрин управленида  кьилин пешекар я. Адан везифайрик чилерин участокар къайдада тунин, абурун сергьятар тайинарунин, чил тайин рекьериз ишлемишунал гуьзчивал тухунин, арендадин икьрарар кутIунунин ва маса месэлаяр акатзава.

Райондин администрациядин жавабдар работникри ва чилихъ галаз алакъалу организацийринни къурулушрин руководителри чаз лагьайвал, Фазил Аликович хъсан пешекар я.  Адан сивел хъвер алаз, гуьгьуьл гьамиша шад яз аквада. И арада зи рикIел туьркерин шаир Назим Хикмета лагьай келимаяр къведа: «Ашкъидалди кIвалахал физвай ва шадвилелди кIвализ хквезвай инсан бахтлу кас я». Эхь, за кьатIайвал, Фазил Муьгьуьдиноваз рикI алай кIвалахди шадвал, руьгьдин таъминвал гузва.

Фазил Аликовичаз руьгьдин­ таъминвал, рикIин динжвал ва шадвал адан низамлу, гьуьрметлу хизандини гузва. Адан уьмуьр­дин юлдаш Назила Мефтялиевнади Герейханован 2-нумрадин юкьван школада муаллимвиле кIвалахзава, гьа са вахтунда­ школадин библиотекадин заведующийдин везифаярни тама­марзава. Абурун гада Гьасана Да­гъустандин политехнический институт акьал­тIарна, алай вахтунда республикадин «Трансгаз» кар­ханада кьилин пешекар яз кIвалахзава.

Шаз юкьван школа акьалтIарай руш Эльмиради медколледжда 2-курсуна кIелзава.

Хазран Кьасумов