Сардар Абилан къелемдикай хкатай са шумуд эсердин арада кIелзавайбуру гзаф хушвилелди кьабулай «Кьве дидедин хва» роман ава. Адан кьвед лагьай пай чна кьарайсузвилелди гуьзлемишзава. Мадни шад жедай крарикай сад и мукьвара кIелдайбурув агакьнавай «Бушлат» ктаб я. Заз и ктабдикай жуван фикирар лугьуз кIанзава.
ЦIийи эсер чапдай акъатун мубарак авунихъ галаз сад хьиз, вичиз Аллагьди гележегда чун мадни шадардай артух къуватар гана кIанзава. Ктаб 110 чиникай ибарат я. Адаз редакторвал медениятдин «Куьредин ярар» центрадин регьбер, шаир, журналист Агьмедпашаев Агьмедпашади авунва. Ктабдихъ хуш акунар ава.
Ктабда алай вахтунда Украинадин мулкарал давам жезвай женгера иштиракай кьве дустунин – лезгидинни чечендин арада авай сих алакъайрикай ихтилат физва. Сада-садан бушлатар дегишариз алукIиз вердишвиляй абурун кьилел къвезвай дуьшуьшрикай, аскервили абурун арада авай дуствал лигимаруникай галай-галайвал рахазва. И эсер кIелдай ашкъи къведа, гьевес хкаж жеда. На лугьуди, вун, яни кIелзавайди, гьа вакъиаяр кьиле физвай чкада ва я къваларив гва.
Къейдна кIанда, вакъиаярни дуьшуьшар ачухарзавай чIалан такьатар авторди гзаф устадвилелди ишлемишун кIелдайбуру гзаф хушвилелди кьабулзава. Ктабдин кьилин игитдинни силисчидин арада физвай рахунар-гьуьжетар ва игитди вич тухузвай тегьер тербиядин жигьетдай таъсирлубур хьанва. «Бушлат» кIелайла хейлин цIийи крарикай, хабаррикай чир жеда.
Ктаб ватанпересвилел, дагълух халкьарин бубайрилай атанвай адетрал ва къенин йикъан яшайишдин къанунрал бинеламиш хьанва, регьятдиз гъавурда акьадайвал кхьенва. Ктабди чи эдебиятдихъ экуь гележег авайдак умуд кутазва. За жуван ва кIелзавайбурун патай Сардар Абилаз рикIин сидкьидай сагърай лугьузва. Инлай кьулухъни ада чун вичин бажарагъдалди шадардайдал шак алач.
Райсудин Набиев,
зегьметдин ветеран
