Делилри ва гьар юкъуз къвезвай кьван мугьманри къадим Дербент шегьер туризмдин макандиз элкъуьрзава. И кар фикирда кьуна, чкадин администрацияди шегьер туристрин фикир мадни желбдайди ийиз чалишмишвалзава.
ИкI, Нарын-къеледин кеферпатан цал фенвайвал, «Дербент-вино» компаниядин дараматдин къвалав, гьасятда инсанрин виле акьадай хьтин ажайиб дараматар гва. Абур Москвадин архитектор, яратмишдай «Мастерская-ТАФ» объединенидин иштиракчи Ник Белован куьмек галаз эцигнава. Къацу векь экъечIнавай чIурал (аниз арт-поляна лугьузва) квадратдиз ва кIватIуниз (шар) ухшар вад дарамат аквазва.
Архитектор Белован гафаралди, сифте дугуна ципицIдин кулуникай ва шуьшедикай са шумуд агъзур путулкадин куьмекдалди шар яратмишдай фикир авай. Ахпа, къванцикай зурба къеле эцигай устIаррин устадвилиз гьуьрмет авунин лишан яз, къванцикайни металлдикай кубар туькIуьруьн хъсан акуна. Вад лагьай куб ципицIдин кулуникай авуна.
Пешекарри тIвар ганвай арт-объектрал гьам мугьманривай ва гьам шегьерэгьлийривай физ ва абурал гьейранвализ жеда. Анжах са кар ава: виликамаз жув регистрация авуна кIанзава. Ажайиб дараматар августдин юкьвара ишлемишиз вахкана. Исятда къеледин кеферпатаз физвай инсанрин кьадарни артух жезва.
Чна винидихъ лагьайвал, шегьердин администрацияди туристриз ял ядай, шегьердихъ галаз таниш жедай къулай шартIар тешкилун патал герек серенжемар кьабулзава. И кар алай месэлайриз талукь яз «Алые паруса» мугьманханада махсус совещанини кьиле тухвана.
Шегьердин администрациядин кьил Рустамбег Пирмегьамедова къейд авурвал, администрацияди шегьерэгьлийрин яшайиш хъсанарун, мугьманриз кутугай шартIар тешкилун патал алакьдай вири крар ийизва. Мугьманханайрин чIехибуру, кирида кIвалер вугузвайбуру мугьманриз къуллугъар авунин кар авайдалай хъсанарун герек я. Наразивалдай себебарни ава. Туристрин кьадар гзаф жердавай мугьманханайрин къиметар виниз акъатзава. ИкI тирвиляй туристар кирида кIвалер кьуниз мажбур жезва. Ужуз акъваззаватIани, анра къулайвилер, ийизвай къуллугъар тарифдайбур я лугьуз жедач.
Совещанидал мугьманханайрин комплексар цIаяр кьуникай, террориствилин ва маса тахсиркарвилерин гьерекатрикай, гьуьлуьн ятара батмиш хьуникай хуьниз талукь серенжемар кьабулун лазим тирдакай, и важиблу месэлаяр гьамиша рикIел хвена кIанзавайдакайни лагьана.
Дербент шегьердин ОВД-дин жемиятдин къайда-низам хуьнин рекьяй отделдин начальникдин заместитетель Фридин Жафарова малумарайвал, талукь органри мугьманрин ва шегьерэгьлийрин хатасузвал хуьн патал чпелай аслу вири крар ийизва.
Хийир Эмиров
