Аялрин лагерриз финиз талукь тир Рд-дин медениятдин министерстводин программадин сергьятра аваз, алай йисан 10-июлдиз Лезги театрдин артистар Мегьарамдхуьруьн районда авай «Приморский» ДООЛ-диз мугьман хьана. И гьакъиндай «Лезги газетдиз» Мегьарамдхуьруьн райондин администрациядин пресс-къуллугъди хабар гузва.

1-3-классра кlелзавай аялар патал В.Орлован «Къизилдин цицlиб» мах, 4-8-классра авайбур патал К.Шапиеван «Насреддинан къизилдин лам» махар сегьнеламишна къалурна. Махарин метлебдикай аялриз Лезги театрдин директордин заместитель Нариман буржалиева ихтилатна. Устадвилелди къалурай махар аялриз гзаф хуш хьана. Махар сегьнедилай къалурайдалай кьулухъ лагердин къуллугъчиди лезги театрдин коллективдиз рикlин сидкьидай сагърай лагьана.

«Лезги газет»