29-августдиз РД-дин Гьукуматдин Председателдин заместитель Нариман Абдулмуталибовни РД-дин транспортдин ва рекьерин майишатдин министр Жамбулат Салавов СтIал Сулейманан районда рекьер цIийикIа туькIуьр хъийизвай гьалдихъ галаз таниш хьана.

Сифте нубатда абуру чкадин администрациядин векилрихъ галаз санал «Курхуьр-КIварчагъ-Сиртич» рекье кьиле тухузвай кIва­лахриз къимет гана. Къейд ийин хьи, ина кIва­лахар «Дагестанавтодор» ГКУ-дин заказдалди рекьерин фондунин такьатрихъ «Ботлихагропромдорстрой» ООО-ди тамамарза­ва. Алай вахтунда, рекьин тайин тир учас­то­кар къайдадиз гъана, са къат къир цанва. Кьвед лагьай къат пудратчи карханади са вацралай цадайвал я.

Гуьгъуьнлай вице-премьерни министр «Мам­рач–Ташкапур–Аракандин муьгъ» рекьин цIийикIа туькIуьр хъийизвай участокдиз килигна. Ина кIвалахар «Хатасуз ва ерилу рекьер» милли проектдин сергьятра аваз тамамарзава.

СтIал Сулейманан районда авай чIавуз Н.Абдулмуталибовани Ж.Салавова «АлиЯк»­ агрохолдингдин агромайданар авай чкадиз Кьулан СтIалрин хуьряй 3 километрдин мензилда къир цунин месэлани веревирдна. Ж.Салавова къейд авурвал, республика экономикадин рекьяй вилик тухунин, агьалийрин яшайишдин шартIар хъсанарунин карда иштиракзавай инвестицийрин проектриз куьмек гун важиблу я. Адан гафарай малум хьайивал, «АлиЯк» агрохолдингдин майданар алай чкадиз кьван рехъ туькIуьруниз талукь проект­динни сметадин документриз экспертизади разивилин къимет ганва. Мукьвара кIвалахрив эгечIдайвал я.

Агьмед  Магьмудов