2023-йисан 7 вацран къене Дагъустандиз 1 миллиондилай гзаф туристар мугьман хьанва. РД-дин туризмдин ва халкьдин художественный сеняткарвилерин министр Эмин Мерданован гафаралди, и рекъем, шазандав гекъигайла, 15 процентдин артух хьанва.
Эхиримжи йисара Дагъустандин надир чкайриз килигиз къвезвайбурун кьадар гзаф хьуни Дагъларин уьлкве неинки са чи уьлкведа, гьакI адалай къецепатани машгьур хьуниз таъсирзава. Махачкъаладин аэропортунин пресс-къуллугъди раижзавай делилрай ашкара жезвайвал, цIи самолетра аваз республикадиз атанвайбурун кьадарни, 2022-йисав гекъигайла, 15 процентдин артух хьанва. Лагьана кIанда, республикадин меркездин аэропортуна икьван чIавалди авачир цIийи маршрутарни кардик акатнава.
Дагестанстатдин гьахъ-гьисабрай малум жезвайвал, алай йисан январь-июнь варцара туризмдин хиле авунвай къуллугърин умуми кьадарди 4,22 миллиард манат тешкилнава. Шазан гьа и девирдив гекъигайла, и рекъем 19,2 процентдин хкаж хьанва.
«Лезги газет»
