14-августдиз Кьасумхуьруьн библиотекадин залда Дагъустандин халкьдин писатель Гьаким Къурбанан (Акимов Къурбан Халикьович) юбилейдиз талукьарнавай мярекат кьиле фена. Аниз лезги ва табасаран районрай яратмишдай интеллигенциядин векилар атанвай. Абуру чпин ихтилатра Гьаким Къурбан лезги халкьдин къагьриман хва тирди, мисалар гъиз, тестикьарна.
Гьаким Къурбанан хайи хуьр (1938-йис) Миграгъ-Къазмаяр ятIани, адан халис ватан СтIал Сулейманан район хьана лагьайтIа, гъалатI жедач.
Университет акьалтIарайдалай гуьгъуьниз ада Цмуррин, Агъа Хъартасрин мектебра чIаланни литературадин муаллим, КIварчагърин мектебда директор яз кIвалахна.
Къ. Акимов а чIавуз Кьасумхуьруьн райондин Гьуьрметдин доскада гьатуниз лайихлу хьайи сад лагьай муаллим хьана.
1964-йисалай, меркездиз хъфена, илимдин кIвалахрал машгъул хьайидалай кьулухъ ада аялар ва муаллимар патал гзаф учебникар ва программаяр туькIуьрна, литературадин, тарихдин, культурадин месэлаяр ахтармишна ва абуруз талукь ктабар чапдай акъудна.
Дагъустандин халкьдин писатель, алим, литературовед, педагогикадин илимрин кандидат, филологиядин илимрин доктор, профессор Гьаким Къурбан зурба общественный деятелни я. 1990-йисуз ада Лезги писателрин Союз ва вири районра адан отделенияр кардик кутуна, регьбервал гана. 1993-йисуз чи меркезда «Жегьил литератор» тIвар алай мектеб ачухна.
Къурбан Акимован художественный ктабар, энциклопедияр гилан ва къвезмай несилар патал зурба ядигарар я. Абур халкьдиз гьамишалугъ багьа яз амукьда.
Къуй Къурбан Халикьовичахъ мягькем сагъвал ва мадни агалкьунар хьурай!
А.Агьмедпашаев,
медениятдин «Куьредин ярар» центрадин регьбер,
РФ-дин журналистрин Союздин член
