Гьуьрметлу «Лезги газетдин» редакция!

Газет лезги халкьдин мез, чи руьгьдин лувар я. «Лезги газетдин» куьмекдалди чун гьар са райондихъ, гьар са хуьруьхъ ва гьар лезги стхайрихъни вахарихъ галаз рахазва. Газетдин тираждин кьадар кьвед-пуд сеферда артухариз хьанайтIа, хъсан жедай.

Эгер чна къедамаз чи бубайрин ватан, дидедин чIал хуьн тавуртIа, гележегда лезгийрин чIал мецелай алатда, чахъ ватан амукьдач. Лезгийрин тарих лап зурбади я. Чахъ дегь девиррилай инихъ гзаф кьадар игитар, шаирар, алимар, кьегьал рухваярни рушар хьана, ава. Абурун викIегьвилер, агалкьунар рикIера хуьн чи буржи я.

Лезги халкьдихъ гьял тавунвай месэлаяр пара ава. Кьве патал пай хьуникди чун чавай къвердавай къакъатзава. Азербайжанда авай  лезги хуьрерихъ галаз алакъа атIузва, сад-садан патав фин четин месэладиз элкъвенва. ВацIун а пата авай халкь дидедин чIалавайни къакъатзава. И месэлаяр ислягьвилелди, хъсан къуни-къуншийри хьиз, Азербайжандин гьукумдихъ галаз меслятар авуна, гьялна кIанда.

И карда «Лезги газетдин» редакцияди кьетIен чка кьазва, гьикI лагьайтIа, халкьдин тIал алай месэлаяр къарагъарун, веревирд авун, абурукай гьукумдиз хабар гун адан асул везифайрикай я.

Шихмегьамед Агьмедов