Ремонт хъийида
«Дагъустандин экономика» телеграм-каналди хабар гузвайвал, 2025-йисалди республикада, «Хатасуз ва ерилу рекьер» милли проектдин сергьятра аваз, региондин дережадин саки 300 километрдин мензилда рекьер ремонт хъувун пландик кутунва.
ЦIи и проектдин сергьятра аваз региондин ва чкадин дережадин 135 километрдин рекьер нормативдин гьалдиз хкида ва 39 объект кIвалахун патал (эксплуатация) вахкуда. И макьсадриз 3,56 миллиард манат чара авунва, идакай 984 миллион манат – федеральный бюджетдай.
Алатай йисуз республикада 72, 5 километрдин мензилда рекьер цIийи хъувуна. Санлай къачурла, и кIвалахрин къимет 2,I миллирад манатдиз барабар я.
Артух жеда
Дагстатдин делилралди, алай йисан сад лагьай зур йисуз республикада 440, 2 агъзур тонн нек гьасилна. Им, шазан и вахтунив гекъигайла, 1, 4 процентдин гзаф я. Идакай «Дагъустандин экономика» телеграм-каналди хабар гузва.
КIвачин кьилел гьайванрин як гунин кьадар республикада 66 агъзурни 259 тонндиз барабар я. Идакай чIехи пай агьалийрин майишатра арадал гъанва – 35 агъзурни 256 тонн (йис идалай виликан рекъемдив гекъигайла, им 1,2 процентдин тIимил я), хуьруьн майишатдин тешкилатра 17, 2 агъзур тонн гьасилна.
Дагъустандин майишатра алай йисан сифтегьан 6 вацра какайрин кьадар 99 миллионни 488 агъзурдав агакьнава. Йис идалай виликан делилрив гекъигайла, им 1,4 процентдин гзаф я.
Интернет гьина гзаф ишлемишзава?
Дагъустандин хуьрера яшамиш жезвай агьалийри интернет шегьерэгьлийрилай гзаф ишлемишзава. Дагъустандин рекъемрин рекьяй вилик финин министр Юрий Гьамзатова къейд авурвал, ихьтин делилар сотовый алакъадин операторри раижнава. Идакай «Дагъустандин экономика» телеграм-каналди хабар гузва.Гьамзатован гафаралди, республикада алай йисан вад вацра, 2022-йисан и вахтунив гекъигайла, онлайн-трафик 12 процентдин хкаж хьанва.
Гьа са вахтунда Дагъустандин хуьрерин агьалийрин умуми гьисабдикай 76, 5 процентди смартфонар ишлемишзава: шегьеррив гекъигайла, хуьрера смартфонрикай менфят къачузвайбурун кьадар гзаф я. Хуьрера мобильный интернетни активнидаказ ишлемишзава – са агьалидал юкьван гьисабдалди вацра 21 ГБ интернет-трафик гьалтзава. Шегьерэлийрив гекъигайла, им 5 процентдин гзаф я.
Кьуд сеферда артух хьанва
Дагъустанда 2023-йисан сад лагьай паюна банкунин картайралди общественный улакьда рекьин гьакъи гунин кьадар 4 сеферда артух хьанва. ИкI, и къайдада гьакъи гун 1,7 миллион транзакцийдиз барабар я. Идакай «Дагъустандин экономика» телеграм-каналди хабар гузва.
Къейдзавайвал, нагъд тушир къайдада рекьин гьакъи гун йикъалай-къуз артух жезва. Мисал яз, эквайрингдин къурулушдик (система эквайринг) 350-далай виниз машинар кутунва. Им, йис идалай виликан рекъемдив гекъигайла, 20 процентдин гзаф я.
Дагъустанда общественный улакьда гьи жуьредин хьайитIани банкарин картайралди рекьин гьакъи гуз жеда, анжах картаяр чеб «хкьун тийидай» (бесконтактный) къайдада гьакъи гудай мумкинвал авайбур хьана кIанда.
ЦIийи чилер кардик кутунва
Дагъустанда 2023-йисан сад лагьай зур йисуз хуьруьн майишатдин 5,6 агъзур гектардилай виниз цIийи чилер кардик кутунва. Идакай РД-дин хуьруьн майишатдин ва недай суьрсетдин министерстводин телеграм-каналди хабар гузва.
Санлай къачурла, йисан эхирдалди кардик кутадай цIийи чилерин кьадар 6, 8 агъзур гектардал кьван артухарун пландик кутунва. Им, 2022-йисав гекъигайла 1 агъзур гектардин гзаф я. Ведомстводи къейдзавайвал, и рекьяй кIвалах вилик финин себеб республикада мелиорациядин проектар уьмуьрдиз кечирмишун я.
Гьазурайди – Муса Агьмедов
