Алай йисан эвел кьилера Москвада, Россиядин халкьарин дуствилин университетда, уьлкведин профессоррин сад лагьай фо­рум кьиле фена. Адан сергьятра алай аямдин илимдин, кьилин образованидин ва “2018-йисан профессор” конкурс тешкилунин, кьиле тухунин месэлаяр веревирдна. Форумда, санлай къачурла, уьлкведин жуьреба-жуьре вузрай атанвай 1000-дав агакьна профессорри иштиракна. РикIел хкин: “2018-йисан профессор” конкурс апрелдин вацралди давам хьана. Премия образованидин ва илимдин хиле еке агалкьунар къазанмишнавай алимриз гузвай. Конкурсда чи ватанэгьли, машгьур алим ва духтур, профессор  Рашид  Сейфиевич  Гьажиевани  иштиракна.

Шад жедай кар ам я хьи, конкурсдин комиссияди кьабулай къарардин нетижада Кьиблепатан ва Кеферпатан федеральный округрин номинациядай “2018-йисан профессор” премиядин лауреатвилин тIвар Дагъус­тандин медакадемиядин жемиятдин сагъламвилин ва здравоохраненидин кафедрадин заведующий, профессор Рашид Сейфие­вич Гьажиеваз га­на. Алимдив медаль, дип­лом­­ ва къиметлу пишкешар мукьвара Москвада, Россиядин халкьарин дуствилин университетда, вахкана­.

Рашид Сейфие­вич Гьажиев 1937-йисуз До­къузпара райондин Къурушрин хуьре ди­де­диз хьана. 1966-йисуз ада вири вадар аваз Астрахандин мединститут акьалтIар­на. 1966-1992-йисара Рашид Гьажиева Тульский областда Липецкдин медсанчастунин ва Заокский райондин центральный больницадин кьилин духтур яз зегьмет чIугуна.

1993-йисалай къенин йикъалди алимди Дагъустандин медакадемиядин кафедрадин заведующий яз кIва­лахзава. 1997-2008-йисара медакадемиядин проректордин везифаяр тамамарна.

1979-йисуз Р. Гьажиева илимрин кандидатвилин, 1992-йисуз докторвилин диссертацияр хвена. 1995-йисуз чи бажарагълу ватанэгьлидиз профессордин тIвар гана. Р.С. ­Гьажиев РФ-дин лайихлу духтур, РД-дин илимдин лайихлу деятель, ДГМУ-дин лайих­лу профессор, илимрин международный академиядин ва информатикадин международный академиядин академикни я. Адан регьбервилик кваз докторвилин — 3, кандидат­вилин 27 диссертация хвена. Алимдин къелемдикай илимдин 475 кIвалах хкатнава. Абу­рун арада 12 монография, 8 учебник, ВАК-дин журналра чапнавай 97 макъала ава.

Р.Гьажиева датIана вичел кIва­лахзава. Ам “Здравоохраненидин экономика”, “Умуми практи­кадин духтур”, “Сестринский делодин бинеяр”, “Медицинадин куьмекдин ери ва адалди таъминарун”, “Медицинадин страхование”, “Медицинадин идарайра зегьметдин менфятлувал артухардай рекьер” ва хейлин маса ктабрин автор я. Абурукай алай вахтунда уьлкведин медицинадин вузра гегьеншдиз менфят къачузва.

Рашид Гьажиев здравоохраненидин чIе­хи тешкилатчи я. Тулада зегьмет чIугваз­вай йисара ам мукьвал-мукьвал СССР-дин Минздравдин аппаратдиз кIва­лахал желбзавай. И йисара ада тамамарай са жерге кIва­лахриз еке къимет гана. Азад вахт саки жез­вачиртIани, 11 йисуз чи ватан­эгьлидикай Тульский областдин исполкомдин депутатни­ хьана. Гьа са вахтунда ада “Фельдшер ва аку­шерка” журналдин редактордин везифаярни тамамарна. Адан тIвар Тульский об­ла­стдин машгьур инсанрин “Альманахда” гьатнава. Рашид Сейфиевичан тIвар 2012-йисуз Швейцарияда акъатнавай “Дуьньядин машгьур алимар” энциклопедиядикни кутунва.

Р.Гьажиев лайихлу хьанвай государстводин наградаяр ва тIва­рар: Халкьарин дуствилин орден (1986-йис), В.И.Ленинан 100 йис тамам хьунихъ галаз алакъалу яз ганвай “Гьакъисагъ зегьметдай” медаль (1970-йис), “Зегьметдин ветеран” (1989-йис), “СССР-дин здравоохраненидин отличник” (1977-йис), “РСФСР-дин лайихлу духтур” (1981-йис), “РД-дин илимдин лайихлу деятель” (1998-йис), “Гьакъисагъ зегьметдай” ЧIехи Петрдин медаль (2006-йис), “Образованидин хиле къалурнавай агалкьунрай” медаль (2007-йис), “ДГМУ-дин лайихлу профессор” (2009-йис), “Гьакъисагъ зегьметдай” медаль (2018-йис).

Чна Рашид Сейфиевичаз нубатдин агалкьун рикIин сидкьидай мубаракзава. Куь гьа­къи­сагъ зегьметдин рехъ мадни бегьерлуди хьун чи эрзиман мурад я, гьуьрметлу алим!

Гьажи Къазиев