Дагъустан Республикадин Кьилин вези­фа­яр вахтуналди та­мамарзавай В.Васильева мукьвара Махачкъалада, Урусрин драм­­­теа­тр­дин дараматда, здравоохраненидин хиле на­муслудаказ кIвалахзавай са жерге работникрив “Дагъустан Респуб­лика­дин­ лайихлу духтур” ва “Да­гъус­тан Республикадин здраво­ох­раненидин лайихлу работник” лагьай гьуьр­мет­дин тIварар ганвайвилин наградаяр вахка­на.

“Дагъустан Республикадин здравоохраненидин лайихлу работник” лагьай тIвар ганвайбурун арада Сулейман-Стальский райондин центральный больницадин аялар хадай отделенидин медсестра Г уьльпери  Нурдиновна  Дадашевани  авай. Адаз лайихлу тIвар гун Дагъустан Республикадин здравоохраненидин министр Жамалудин Гьажи­иб­рагьи­мовани мубаракна.

Гуьлпери Дадашева 1959-йисуз Кьасумхуьрел дидедиз хьана. Юкьван школа акьал­тIарай 1976-йисуз ам Дербентдин медицинадин училищедик экечIна. 1980-йисуз анаг хъсан чирвилер аваз акьалтIарна. Са шумуд вацра жегьил пешекарди Дербент шегьердин центральный больницада кIва­лахна.

1980-йисан сентябрдилай Г.Дадашевади, чна винидихъ лагьайвал, райондин центральный больницадин аялар хадай отделенидин аялрин палатадин медсестра яз кIва­лахзава.

— Гуьльпери Нурдиновна пешедал рикI алай, масадан дердиникай хабар кьадай инсан я, — лугьузва ЦРБ-дин кьилин духтур Мак­сим Ханбалаева. — Вичин­ хи­ве авай везифайрив ам рикI гваз, жавабдарвал гьисс аву­налди эгечI­зава. Лайихлу тIва­рар чи кIва­­лахдин юлдашдихъ гзаф ава.

Г.Дадашевадихъ галаз суьгьбетдайла малум хьайивал, эхиримжи йисара районда хазвай бицIекрин кьадар артух, рекьизвайбурун кьадар лап тIимил хьанва. И кардал медсестради шадвалзава.

— Заз зи кIвалах гзаф кIанда, гьикI лагьай­тIа ам дуьньядиз къвезвай бицIекрихъ галаз ала­къалуди я, — лугьузва Г.Дадашевади. — Би­цIекдин шелдин ван хьайила, шадвиляй зак лувар акатзава. БицIекрин шелдин, дидейрин хъвердин ван тахьай гьич са хизанни тахьурай лугьуз, за гьамиша Аллагьдиз ялварзава.

Зун ЦРБ-дин аялар хадай отделенидин “Арзайрин ва теклифрин ктабдизни” килигна. Г.Дадашевадин намуслу зегьметдикай, мецин ширинвиликай, ана бицIек­рин дидейри гзаф кхьинар авунва, адаз алхишзава. Гуьльпери Нурдиновнадин гьуьрметдай чпин веледрал адан тIвар эцигнавай дидейрин кьадарни тIимил туш.

Къайгъудар пешекар хьиз, Г.Дадашева донорни я. Ада иви гуз гзаф йисар я. 2014-йисан 16-де­кабрдиз адаз “Россиядин гьуьр­­­метлу донор” знакни гана. 2015-йисан майдиз Г.Дадашева “РД-дин здравоохраненидин отличник” медалдиз лайихлу хьана­.

Гьуьрметлу Гуьлпери Нурдиновнадикай кхьидайла, зи рикIел Платонан гафар хтана: “Масадбурун бахтунин къайгъуда авайдаз жуван бахтни жагъида”. Гьакъи­къат­дани, Г.Дадашевади къе вич бахтлу инсан яз гьисабзава. И бахтлувални адаз неинки рикI алай, инсанриз герек пешедин иеси хьунай, гьакIни вичихъ хуьре­-кIвале гьуьрмет авай хизан, ферли веледар хьунайни аквазва.

Гуьлпери Нурдиновнадин хва Мусани духтур я. Зи фикирдалди, и пеше ада вичин дидедиз инсанрин патай авай гьуьрмет-кIа­нивал, духтурвилел дидедин кьарувал акуна хкяна. Алай вахтунда Муса Дадашевича Санкт-Петербургда медицинадин центрадин кьилин духтурвиле кIвалахзава.

“Дагъустан Республикадин здравоохраненидин лайихлу работник” лагьай гьуьрметдин тIвар мубарак авуналди, чаз Гуьлпери­ Дадашевадихъ кIвалахда мад­ни еке агалкьу­нар хьана кIан­зава.

Хазран Кьасумов