Мукьвара РД-дин рекъемрин рекьяй вилик финин министр Юрий Гьамзатов Ахцегь райондиз мугьман хьанвай. Муниципалитетдин кьил Абдул-Керим Палчаевахъ галаз санал ам Чеперин хуьруьн мектебда цIийикIа туькIуьр хъувунин кIвалахар кьиле физвай гьалдихъ галаз таниш хьана.
Къейд ийин хьи, ина кIвалахар «Модернизация школьных систем образования» программадин сергьятра аваз кьиле тухузва. Къенин юкъуз дараматдин къав дегишнава, цлар къецелай цIийи хъувунва, дараматдин къенепата, спортзалда ва пищеблокда ремонтдин кIвалахар акьалтIарнава. Мукьвара мектебдив цIийи мебелни агакьда.
Юрий Гьамзатова ина кьиле тухванвай кIвалахрин еридилай вичин разивал къалурна, пудратчи карханадин векилрихъ, муаллимрихъ галаз рахана. Министрди къейд авурвал, алай аямдин мектеб неинки тек са чирвилер, гьакIни аялриз чпихъ алакьунар авай рекьерай вилик фидай мумкинвилер гузвай макандиз элкъуьн лазим я. Чеперин хуьруьн цIийикIа туькIуьр хъувунвай мектебда ихьтин шартIар арадал гъиз жеда.
Пудратчи карханадин векилдин гафаралди, мектеб 15-августдиз ишлемишиз вахкудайвал я.
Чи мухбир
