26-июлдиз Махачкъалада Дагъустандин Конституциядин

йикъаз талукьарнавай кьилин мярекатар кьиле фена

Премьер-ми­нистр Абдулмуслим Абдулмуслимова тафаватлу хьайи са жерге­ да­гъустанвийрив шабагьар вахкана. Дуст­­вилин кIвале кьиле фейи и вакъиадиз талукьарнавай мярекат РД-дин Гьукуматдин Председателди ачухна.

«Сифте нубатда заз квез ва вири да­гъус­танвийриз Дагъустандин Кьил Сергей Алимович Меликован патай республикадин Конституциядин югъ рикIин сидкьидай мубаракиз кIанзава. Саки 20 йис идалай вилик дегишвилер кухтур и Кьилин Къанунди чи бинеяр, тарихдин адетар, меденият, чIалар хуьнин, вилик тухунин карда вичин важиблувал къалурна», — лагьана ада.

Абдулмуслим Абдулмуслимова вичин рахунра акьалтзавай несилдин векилар халис ватанпересар яз чIехи авунин карда — муаллимринни дидейрин, агьалийрин сагъламвал хуьнин жигьетдай – духтуррин, дяведин махсус серенжемдин иштиракчийрин хизанриз куьмекар гунин рекье – жеми­ятдин тешкилатрин, Урусатдик акат хъувун­вай цIийи регионра кIвалахзавай дагъус­танви педагогрин зегьмет тариф авуниз лайихлу тирди къейдна.

Гуьгъуьнлай РД-дин Гьукуматдин Председателди 40 дагъустанвидив государстводин шабагьар вахкана. Кьилди къачуртIа, РФ-дин Игит Нурмегьамед Гьажимегьамедован насигьатчи Мегьамед Кунбуттаеваз акьалтзавай несилриз яргъал йисара чирвилерни тербия гунай Россиядин Федерациядин Президентдин Гьуьрметдин грамота гана. Табасаран райондай тир 12 аялдин­ диде Эспет Ханмегьамедова Амет-Хан Султанан тIварцIихъ галай медалдиз ла­йих­лу хьана. Къейд ийин хьи, и дишегьлидин саки вири рухвайрини хтулри чпин уьмуьр военный пешейрихъ галаз алакъалу авуна ва алай вахтунда Украинада кьиле физвай махсус серенжемда иштиракзава. Гьайиф хьи, Эспет Ханмегьамедовадин хтулрикай сад ана кьегьалвилелди телеф хьана.

Къизляр райондин духтурханада 37 йисуз кIвалахзавай Женнет Шейхмегьамедова – «РД-дин здравоохраненидин лайихлу къуллугъчи» тIварцIиз, РД-дин жегьилрин сиясатдин министр Камил Саидов – Амет-Хан Султанан тIварцIихъ галай медалдиз, РД-дин тамарин майишатдин комитетдин председатель Вагьаб Абдулгьамидов Да­гъустандин Кьилин тIварцIин сятиниз лайихлу хьана.

Государстводин шабагьар гьакIни Запорожьедин областдин жуьреба-жуьре мек­теб­ра кIвалахзавай 9 муаллимдиз, Росгвардиядин РД-да авай Управленидин къуллугъчийризни гана.

Къейд ийин хьи, шабагьриз лайихлу хьайибурун арада чи ватанэгьлиярни ава: РФ-дин лайихлу художник Къарахан Сефербегов («РД-дин вилик лайихлувилерай» орден), жемиятдинни сиясатдин машгьур деятель Гьамид Шихагьмедов («РД-дин вилик лайихлувилерай» орден), СтIал Сулейманан райондин Ичинрин хуьруьн мектебдин муаллим Абубакар Мирзебалаев (Да­гъустандин Гьуьрметдин грамота) ва масабур ава.

Агьмед Магьмудов